️ড° বুলজিৎ বুঢ়াগোহাঁই
শিশুসকলৰ কেৰিয়াৰ গঠন এটা দীঘলীয়া আৰু বহুমুখী প্ৰক্ৰিয়া। এই প্ৰক্ৰিয়াত পৰিয়াল, শিক্ষানুষ্ঠান, ধৰ্মীয়-সাংস্কৃতিক সংগঠন, চৰকাৰী-বেচৰকাৰী প্ৰতিষ্ঠান আদিৰ দৰে সামাজিক অনুষ্ঠানসমূহে গুৰুত্বপূর্ণ ভূমিকা পালন কৰে। এই অনুষ্ঠানসমূহে শিশুৰ ব্যক্তিত্ব বিকাশ, দক্ষতা অৰ্জন আৰু কেৰিয়াৰৰ পছন্দৰ ওপৰত প্ৰত্যক্ষ আৰু পৰোক্ষভাৱে প্ৰভাৱ পেলায়।
সামাজিক অনুষ্ঠানসমূহত শিশুসকলে কবিতা আবৃত্তি, নৃত্য, গীত, নাটক আদিৰ জৰিয়তে নিজৰ সৃজনশীলতা প্ৰদৰ্শন কৰিবলৈ সুযোগ পায়। এই কার্যকলাপে তেওঁলোকৰ আত্মবিশ্বাস বৃদ্ধিৰ লগতে পৰিৱেশ্য কলাৰ ক্ষেত্ৰত কেৰিয়াৰ গঢ়াৰ পথ মুকলি কৰে। লগতে সাংস্কৃতিক সচেতনতা আৰু নিজকে ব্যক্ত কৰাৰ ক্ষমতাও বৃদ্ধি পায়। এই অনুষ্ঠানসমূহত সফল ব্যক্তি, বক্তা আৰু বিশেষজ্ঞসকলৰ উপস্থিতিয়ে শিশুসকলক অনুপ্ৰাণিত কৰে। তেওঁলোকৰ অভিজ্ঞতা আৰু উপদেশে শিশুসকলক লক্ষ্য স্থিৰ কৰাত সহায় কৰে, লগতে ৰোল মডেল হিচাপে বিভিন্ন কেৰিয়াৰ সম্ভাৱনাৰ সৈতে পৰিচয় কৰাই দিয়ে। দলগত প্ৰতিযোগিতা, সাংস্কৃতিক অনুষ্ঠান বা সমাজসেৱামূলক কাৰ্যসূচীত অংশগ্ৰহণ কৰাৰ জৰিয়তে শিশুসকলে সহযোগিতা ,নেতৃত্ব,দায়িত্ববোধ আদি গুণাৱলী বিকাশ কৰে। এই গুণবোৰ যিকোনো কেৰিয়াৰৰ ক্ষেত্ৰত সফল হোৱাৰ বাবে অতি প্ৰয়োজনীয়। সামাজিক অনুষ্ঠানসমূহে শিশুসকলক নতুন বিষয়, কলা-কৌশল আৰু প্ৰযুক্তিৰ সৈতে পৰিচিত কৰায়। উদাহৰণস্বৰূপে, বিজ্ঞান মেলা, বক্তৃতা প্ৰতিযোগিতা, হস্তশিল্প কর্মশালা আদিয়ে শিশুৰ কৌতূহল আৰু কৰ্মদক্ষতা বৃদ্ধি কৰে। এই অভিজ্ঞতাসমূহে তেওঁলোকক নিজৰ আগ্ৰহৰ ক্ষেত্ৰ চিনাক্ত কৰাত সহায় কৰে। ধৰ্মীয় আৰু সাংস্কৃতিক অনুষ্ঠানসমূহে শিশুসকলক নৈতিকতা ,শ্ৰমৰ মূল্য, সমাজৰ প্ৰতি দায়িত্ব আদি মূল্যবোধ শিকায়। এই মূল্যবোধসমূহে তেওঁলোকৰ কেৰিয়াৰ বাছনি আৰু ব্যক্তিগত বিকাশত ইতিবাচক প্ৰভাৱ পেলায়। ক্ৰীড়া অনুষ্ঠানসমূহে শিশুৰ শাৰীৰিক আৰু মানসিক সুস্থতা নিশ্চিত কৰাৰ লগতে খেলৰ জগতত কেৰিয়াৰ গঢ়াৰ পথ মুকলি কৰে। এই অনুষ্ঠানসমূহে শৃংখলা, সহনশীলতা আৰু প্ৰতিযোগিতামূলক মনোভাৱ গঢ়ি তোলে।
সামাজিক অনুষ্ঠানসমূহে শিশুৰ কেৰিয়াৰ গঠনত এক বহুমুখী ভূমিকা পালন কৰে। ই শিশুক কেৱল বিনোদন প্ৰদানেই নকৰে, ইয়াৰোপৰি তেওঁলোকৰ ব্যক্তিত্ব গঠন, দক্ষতা বিকাশ আৰু ভৱিষ্যতৰ কেৰিয়াৰ পথ নিৰ্ধাৰণতো গুৰুত্বপূৰ্ণ অৱদান আগবঢ়ায়। সেয়েহে অভিভাৱক, শিক্ষক আৰু সমাজৰ সকলো শ্ৰেণী-স্তৰৰ লোকৰ উচিত শিশুক এইবোৰ অনুষ্ঠানত সক্ৰিয়ভাৱে অংশগ্ৰহণ কৰিবলৈ উৎসাহিত কৰিলে ভাল হয়। এনেধৰণৰ সুস্থ সামাজিক পৰিৱেশে শিশুৰ উজ্জ্বল ভৱিষ্যত গঢ়াৰ ভেটি গঠন কৰে।
ড° বুলজিৎ বুঢ়াগোহাঁই
কেৰিয়াৰ পৰামৰ্শদাতা তথা
মুৰব্বী, যান্ত্রিক অভিযান্ত্রিক বিভাগ, অসম ডন বস্ক’ বিশ্ববিদ্যালয়
ফোন: ৯৪৩৫১৮৮৬৩০
ই-মেইল: buljit@gmail.com
