নিউজ ডেস্ক :
বিশ্বৰ ক্ৰিকেটৰ ইতিহাসত শুকুৰবাৰে এক নতুন সোণালী অধ্যায় সংযোজিত হ’ল, যাৰ নায়ক মাত্ৰ ১৪ বছৰীয়া ভাৰতীয় তৰুণ ক্ৰিকেটাৰ বৈভৱ সূৰ্যবংশী। ২০২৬ চনৰ আই চি চি ১৯ বছৰ অনূৰ্ধৰ বিশ্বকাপৰ ফাইনেলত ইংলেণ্ডৰ বিৰুদ্ধে তেওঁ যি ১৭৫ ৰানৰ মাৰাথন ইনিংছ উপহাৰ দিলে, সেয়া ক্ৰিকেটপ্ৰেমীৰ বাবে আছিল এক বিৰল অভিজ্ঞতা। মাত্ৰ ৮০টা বলত ১৫ টা ছয় আৰু ১৫ টা চাৰিৰে সজোৱা এই ইনিংছটোৱে কেৱল ১৯ বছৰ অনূৰ্ধৰ বিশ্বকাপৰ ফাইনেলত সৰ্বাধিক ব্যক্তিগত স্ক’ৰৰ বিশ্বৰেকৰ্ডেই গঢ়া নাই, বৰঞ্চ ২০২২ চনত এলিছা হিলিয়ে গঢ়া ১৭০ ৰানৰ অভিলেখো ভংগ কৰে। হাৰাৰে স্প’ৰ্টছ ক্লাবত অনুষ্ঠিত এই মেচত বৈভৱৰ বিধ্বংসী বেটিঙৰ সহায়ত ভাৰতে ইংলেণ্ডক ১০০ ৰানৰ ব্যৱধানত পৰাস্ত কৰি ষষ্ঠবাৰৰ বাবে বিশ্বকাপ ট্ৰফী দখল কৰিবলৈ সক্ষম হয়। তেওঁৰ এই প্ৰদৰ্শনত মুগ্ধ হৈ ক্ৰিকেট বিশেষজ্ঞসকলে তেওঁক ভাৰতীয় ক্ৰিকেটৰ পৰৱৰ্তী মহাতাৰকা বুলি অভিহিত কৰিছে।
বৈভৱৰ এই ঈৰ্ষণীয় সফলতাৰ ভেটি আচলতে বিগত বৰ্ষৰ আই পি এলতে গঢ় লৈ উঠিছিল, য’ত তেওঁ ৰাজস্থান ৰয়েলছৰ হৈ খেলি সমগ্ৰ বিশ্বৰ দৃষ্টি আকৰ্ষণ কৰিছিল। ২০২৫ চনৰ আই পি এলত গুজৰাট টাইটানছৰ বিৰুদ্ধে মাত্ৰ ১৪ বছৰ ৩২ দিন বয়সত তেওঁ যি ১০১ ৰানৰ ইনিংছ খেলিছিল, সেয়া আছিল আই পি এলৰ ইতিহাসৰ কনিষ্ঠতম শতক। ক্ৰিকেটৰ ‘টেকনিক’ৰ ফালৰ পৰা বৈভৱৰ বেটিঙক প্ৰাক্তন ক্ৰিকেটাৰ অভিনৱ মুকুন্দৰ দৰে বিশেষজ্ঞই উচ্চ প্ৰশংসা কৰিছে। বিশেষকৈ তেওঁৰ ‘পুল’ শ্বট খেলাৰ সময়ত বেটৰ ‘বেকলিফ্ট’ আৰু ‘হেণ্ড-আই কৰ্ডিনেশ্যন’ এক ব্যতিক্ৰমী প্ৰতিভাৰ পৰিচায়ক। মাত্ৰ ১৩ বছৰ বয়সতে ৰাজস্থান ৰয়েলছে ১ কোটি ১০ লাখ টকাত তেওঁক দলত অন্তৰ্ভুক্ত কৰাৰ সিদ্ধান্ত যে ভুল নাছিল, সেয়া বৈভৱে নিজৰ ধাৰাবাহিক প্ৰদৰ্শনেৰে বাৰম্বাৰ প্ৰমাণ কৰি দেখুৱাইছে।
এই গ্লেমাৰ আৰু সফলতাৰ আঁৰত অৱশ্যে লুকাই আছে বিহাৰৰ সমস্তিপুৰ জিলাৰ তাজপুৰ গাঁৱৰ এটা কৃষক পৰিয়ালৰ অকল্পনীয় ত্যাগ আৰু সংগ্ৰামৰ কাহিনী। পুত্ৰৰ ক্ৰিকেটৰ প্ৰতি থকা অদম্য ধাউতি দেখি পিতৃ সঞ্জীৱ সূৰ্যবংশীয়ে কেৱল নিজৰ খেতিৰ মাটি বিক্ৰী কৰাই নহয়, ঘৰৰ পিছফালে এখন অনুশীলনৰ ঠাই সাজি দি নিজেই প্ৰথম প্ৰশিক্ষকৰ দায়িত্ব লৈছিল। মাত্ৰ ৯ বছৰ বয়সতে সমস্তিপুৰৰ ক্ৰিকেট একাডেমীত নামভৰ্তি কৰা বৈভৱে প্ৰশিক্ষক মনিষ ওঝাৰ তত্ত্বাৱধানত দিনে ৪০০-৫০০ টা বল খেলি নিজকে প্ৰস্তুত কৰিছিল। আৰ্থিক অনাটন আৰু সামাজিক প্ৰত্যাহ্বানৰ মাজতো পিতৃৰ এই সপোনক সাৰথি কৰি মাত্ৰ ১২ বছৰ বয়সতে বিহাৰৰ হৈ ৰঞ্জী ট্ৰফীত অভিষেক ঘটাই তেওঁ আধুনিক ভাৰতীয় ক্ৰিকেটত এক বিৰল নজিৰ সৃষ্টি কৰিছিল।
Vaibhab Suryavanshi
বৈভৱৰ ফিটনেছ ক’চ চিন্ময় ৰয় আৰু শৈশৱৰ প্ৰশিক্ষক মনিষ ওঝাৰ মতে, বৈভৱৰ মানসিক দৃঢ়তা আৰু দীঘলীয়া ইনিংছ খেলাৰ ক্ষমতা তেওঁৰ বয়সৰ আন খেলুৱৈৰ তুলনাত বহুগুণে বেছি। ১৯ বছৰ অনূৰ্ধৰ বিশ্বকাপত সৰ্বমুঠ ৪৩৭ ৰান সংগ্ৰহ কৰি তেওঁ যেনেকৈ টুৰ্ণামেণ্টৰ শ্ৰেষ্ঠ খেলুৱৈ হিচাপে বিবেচিত হ’ল, তেনেকৈয়ে তেওঁ ভৱিষ্যতে ভাৰতীয় চিনিয়ৰ দলৰো নিয়মীয়া সদস্য হোৱাৰ ইংগিত বহন কৰিছে। সম্প্ৰতি বৈভৱ কেৱল বিহাৰৰ গৌৰৱ নহয়, বৰঞ্চ তেওঁ ভাৰতীয় ক্ৰিকেটৰ এক উজ্জ্বল ভৱিষ্যত, যিয়ে আগন্তুক দিনত বিশ্ব ক্ৰিকেটত এক নতুন যুগৰ সূচনা কৰিব।
