● আঠ বছৰ বয়সতে দৃষ্টিশক্তি হেৰুওৱা ইৰফানৰ অদম্য সাহস
● ১৮ বাৰ অস্ত্ৰোপচাৰৰ পিছতো হাৰ নমনা ইৰফানৰ UPSC ত সফলতা
● সৰ্বভাৰতীয় পৰ্যায়ত ৯৫৭ সংখ্যক স্থান লাভ
নিউজ ডেস্ক,নতুন সময়
জম্মু-কাশ্মীৰৰ বান্দিপোৰা জিলাৰ অন্তৰ্গত নাইদখাই গাঁৱৰ এগৰাকী দৃষ্টীহীন যুৱক ইৰফান আহমেদ লোনৰ সাফল্যই শেহতীয়াকৈ সমগ্ৰ দেশৰ দৃষ্টি আকৰ্ষণ কৰিছে। মাত্ৰ আঠ বছৰ বয়সতে দুয়োটা চকুৰ দৃষ্টিশক্তি হেৰুওৱা ইৰফানে শেহতীয়াকৈ ইউ পি এছ চিৰ অসামৰিক সেৱা পৰীক্ষাত সৰ্বভাৰতীয় পৰ্যায়ত ৯৫৭ সংখ্যক স্থান লাভ কৰিবলৈ সক্ষম হৈছে। বান্দিপোৰা জিলাৰ পৰা ইউ পি এছ চি উত্তীৰ্ণ হোৱা তেৱেঁই হৈছে প্ৰথমগৰাকী ব্যক্তি। চাৰি বছৰ বয়সত এটা দুৰ্ঘটনাত চিৰিঞ্জ সোমাই এটা চকু আৰু পৰৱৰ্তী সময়ত বিদ্যালয়ত পেঞ্চিলেৰে খেলি থাকোঁতে চকুত লাগি আনটো চকুৰ দৃষ্টি হেৰুওৱা ইৰফানে পৰীক্ষাৰ প্ৰশ্নকাকত নেদেখাকৈয়ে নিজৰ একাগ্ৰতাৰ বলত এই অসাধাৰণ কৃতিত্ব অৰ্জন কৰিছে।
জলসিঞ্চন বিভাগত দিনহাজিৰা কৰা শ্ৰমিক পিতৃ বছিৰ আহমেদ লোনে পুত্ৰৰ চিকিৎসাৰ বাবে নিজৰ সকলো সা-সম্পত্তি আৰু মাটি-বাৰী বিক্ৰী কৰিছিল। দিল্লীৰ এইমছকে ধৰি বিভিন্ন আগশাৰীৰ চিকিৎসালয়ত ১৮ বাৰকৈ অস্ত্ৰোপচাৰ কৰাৰ পিছতো তেওঁৰ দৃষ্টিশক্তি ঘূৰাই আনিব পৰা নগ’ল আৰু দুৰ্ভাগ্যজনকভাৱে ২০০২ চনত তেওঁ মাতৃকো হেৰুৱায়। সকলো আশা শেষ হোৱাৰ দিশে গৈছিল যদিও পিতৃৰ অদম্য সাহস আৰু সঙ্কল্পৰ বলত ইৰফানে ডেৰাডুনৰ এখন বিশেষ বিদ্যালয়ত ব্ৰেইল আৰু স্ক্ৰীণ ৰিডিং ছফ্টৱেৰৰ সহায়ত নতুনকৈ শিক্ষা জীৱন আৰম্ভ কৰে। পৰৱৰ্তী সময়ত তেওঁ দিল্লী বিশ্ববিদ্যালয়ৰ হিন্দু মহাবিদ্যালয়ৰ পৰা ৰাজনীতি বিজ্ঞানত স্নাতক আৰু জৱাহৰলাল নেহৰু বিশ্ববিদ্যালয়ৰ পৰা আন্তঃৰাষ্ট্ৰীয় সম্পৰ্ক বিষয়ত স্নাতকোত্তৰ ডিগ্ৰী লাভ কৰে।
পাৰিবাৰিক আৰ্থিক অৱস্থাৰ প্ৰতি লক্ষ্য ৰাখি ইৰফানে প্ৰথমে বেংকিং পৰীক্ষাত অৱতীৰ্ণ হৈ পঞ্জাব নেচনেল বেংকত আৰু পৰৱৰ্তী সময়ত জীৱন বীমা নিগমৰ সহকাৰী প্ৰশাসনিক বিষয়া হিচাপে চাকৰিত যোগদান কৰিছিল। কিন্তু পিতৃৰ সপোন পূৰণ কৰাৰ তাগিদাত তেওঁ পূৰ্ণকালীন চাকৰিৰ সমান্তৰালভাৱে স্ক্ৰীণ ৰিডিং ছফ্টৱেৰৰ সহায়ত ইউ পি এছ চিৰ কঠোৰ প্ৰস্তুতি চলাই তৃতীয়টো প্ৰচেষ্টাত সফলতা অৰ্জন কৰিবলৈ সক্ষম হয়। সমাজলৈ এক শক্তিশালী বাৰ্তা প্ৰেৰণ কৰি ইৰফানে সংবাদ মাধ্যমৰ আগত উল্লেখ কৰে যে শাৰীৰিক প্ৰতিবন্ধকতাই কেতিয়াও শিক্ষা গ্ৰহণ আৰু সপোন বাস্তৱায়িত কৰাত হেঙাৰ হ’ব নোৱাৰে। তেওঁ লগতে অভিভাৱকসকলক আহ্বান জনায় যে বিশেষভাৱে সক্ষম সন্তানক ঘৰৰ চাৰিবেৰৰ মাজত আৱদ্ধ কৰি নৰাখি সমাজৰ সৈতে মিলি প্ৰতিযোগিতাত অৱতীৰ্ণ হোৱাৰ সুযোগ প্ৰদান কৰিব লাগে।
