● কেন্দ্ৰীয় বিশ্ববিদ্যালয়ত অধ্যাপক পৰ্যায়ৰ নিযুক্তিত ভয়াৱহ বৈষম্য
– সংৰক্ষিত শ্ৰেণীৰ অধ্যাপক পদত খালী পদৰ হাৰ অতি উদ্বেগজনক
● সৰ্বাধিক ৮৩% পদত নিযুক্তিৰ পৰা বঞ্চিত এছ টি প্ৰাৰ্থী
– চৰকাৰী তথ্যত পোহৰলৈ আহিল এই কথা
●১৮,৯৫১টা অনুমোদিত শৈক্ষিক পদৰ বিপৰীতে খালী পদৰ সংখ্যা ৪,৮৮৯টা
উচ্চ শিক্ষাৰ ক্ষেত্ৰত প্ৰান্তীয় সম্প্ৰদায়সমূহৰ প্ৰতিনিধিত্বত এক বৃহৎ ব্যৱধান পোহৰলৈ আহিছে। চৰকাৰী তথ্য অনুসৰি, ভাৰতৰ কেন্দ্ৰীয় বিশ্ববিদ্যালয়সমূহত অন্যান্য পিছপৰা শ্ৰেণী (অ’বিচি), দলিত (অনুসূচিত জাতি) আৰু জনজাতীয় (অনুসূচিত জনজাতি) শ্ৰেণীৰ বাবে আৱণ্টিত অধ্যাপক পৰ্যায়ৰ পদসমূহত খালী পদৰ হাৰ অতি উদ্বেগজনক।
ৰাজ্যসভাত এক লিখিত উত্তৰত ৰাজ্যিক শিক্ষা মন্ত্ৰী সুকান্ত মজুমদাৰে প্ৰকাশ কৰে যে সাধাৰণ শ্ৰেণীৰ পদসমূহ বহুলাংশে পূৰণ হোৱাৰ বিপৰীতে সংৰক্ষিত শ্ৰেণীৰ পদত ঘাটি অতি বেছি। আটাইতকৈ উদ্বেগজনক বৈষম্য অনুসূচিত জনজাতি (এছটি) শ্ৰেণীৰ ক্ষেত্ৰত দেখা গৈছে, য’ত অধ্যাপকৰ ৮৩% পদ খালী হৈ আছে।
২০২৫ চনৰ ৩০ জুনলৈকে, ১৪৪টা অনুমোদিত পদৰ বিপৰীতে মাত্ৰ ২৪ জন জনজাতীয় অধ্যাপকক নিযুক্তি দিয়া হৈছে। দলিত (এছচি) শ্ৰেণীৰ বাবে ৩০৮টা পদৰ ভিতৰত মাত্ৰ ১১১টা পদ পূৰণ কৰা হৈছে, অৰ্থাৎ খালী পদৰ হাৰ ৬৪%। আনহাতে, অ’বিচি শ্ৰেণীৰ বাবে ৪২৩টা অনুমোদিত পদৰ বিপৰীতে মাত্ৰ ৮৪ জন অধ্যাপকক নিযুক্তি দিয়া হৈছে, যাৰ ফলত খালী পদৰ হাৰ ৮০%।
সামগ্ৰিকভাৱে, কেন্দ্ৰীয় বিশ্ববিদ্যালয়সমূহত ১৮,৯৫১টা অনুমোদিত শৈক্ষিক পদৰ ভিতৰত ৪,৮৮৯টা পদ খালী হৈ আছে, অৰ্থাৎ খালী পদৰ হাৰ ২৫%। কিন্তু, সাধাৰণ শ্ৰেণীৰ মাত্ৰ ১৫% পদ খালী থকাৰ বিপৰীতে সংৰক্ষিত শ্ৰেণীৰ ক্ষেত্ৰত এই সংখ্যা তীব্ৰভাৱে বৃদ্ধি পাইছে, যিয়ে উচ্চ শিক্ষাত সংৰক্ষণ নীতি ৰূপায়ণত ধাৰাবাহিক বিফলতাকে সূচায়।
আন শৈক্ষিক পৰ্যায়তো এই বৈষম্য অব্যাহত আছে। সকলো পৰ্যায় মিলাই অ’বিচিৰ বাবে সংৰক্ষিত ৩,৬৮৮টা পদৰ ৪০% খালী হৈ আছে। অনুসূচিত জাতি (এছচি) সম্প্ৰদায়ৰ বাবে আৱণ্টিত পদৰ ৩০% খালী হৈ থকাৰ বিপৰীতে অনুসূচিত জনজাতি (এছটি)ৰ মাজত খালী পদৰ হাৰ ৩৭%।
সম্প্ৰতি এই তথ্যই ভাৰতৰ বিশ্ববিদ্যালয়সমূহত প্ৰণালীবদ্ধ বঞ্চনা আৰু প্ৰতিষ্ঠানিক পক্ষপাতিত্বক লৈ নতুনকৈ উদ্বেগৰ সৃষ্টি কৰিছে। আৰ জে ডিৰ সাংসদ অধ্যাপক মনোজ কুমাৰ ঝাৰ দ্বাৰা উত্থাপিত এক প্ৰশ্নৰ উত্তৰত এই তথ্য দাখিল কৰা হৈছিল। অধ্যাপক ঝাই আইন অনুসৰি শৈক্ষিক নিযুক্তিৰ ক্ষেত্ৰত সমতা নিশ্চিত কৰিবলৈ জৰুৰীকালীন সংশোধনমূলক ব্যৱস্থা গ্ৰহণৰ বাবে আহ্বান জনাইছে।
