● টেনিছ কৰ্টক চিৰবিদায় কিংবদন্তি ৰাফেল নাডালৰ
● ডেভিছ কাপৰ পাছতেই অৱসৰ ল’ব ৰাফেল নাডালে
● নৱেম্বৰৰ ডেভিছ কাপেই হ’ব অন্তিম প্ৰতিযোগিতা
বিশ্ব ক্ৰীড়া জগতৰ এক সোণালী অধ্যায়ৰ অন্ত পেলাই টেনিছৰ সৰ্বকালৰ অন্যতম শ্ৰেষ্ঠ খেলুৱৈ ৰাফেল নাডালে পেছাদাৰী টেনিছৰ পৰা অৱসৰ গ্ৰহণৰ কথা আনুষ্ঠানিকভাৱে ঘোষণা কৰিছে। শেহতীয়াকৈ এক ভিডিঅ’ বাৰ্তাৰ জৰিয়তে ২২ টা গ্ৰেণ্ড শ্লেম খিতাপ দখলকাৰী স্পেইনৰ এইগৰাকী কিংবদন্তি খেলুৱৈয়ে তেওঁৰ সুদীৰ্ঘ তথা বৰ্ণিল কেৰিয়াৰৰ সামৰণি মৰাৰ কথা প্ৰকাশ কৰে। চলিত বৰ্ষৰ নৱেম্বৰ মাহত স্পেইনৰ মালাগা চহৰত অনুষ্ঠিত হ’বলগীয়া ডেভিছ কাপৰ ফাইনেল-৮ (Davis Cup Final 8) প্ৰতিযোগিতায়েই হ’ব পেছাদাৰী টেনিছ খেলুৱৈ হিচাপে নাডালৰ জীৱনৰ অন্তিমখন প্ৰতিযোগিতা।
‘কিং অফ ‘ক্লে’ হিচাপে পৰিচিত নাডালৰ কেৰিয়াৰৰ পৰিসংখ্যা সঁচাকৈয়ে ঈৰ্ষণীয় আৰু বিস্ময়কৰ। তেওঁ নিজৰ কেৰিয়াৰত ১৪ টাকৈ ফ্ৰেন্স অ’পেন খিতাপকে ধৰি মুঠ ২২ টা গ্ৰেণ্ড শ্লেম খিতাপ অৰ্জন কৰিবলৈ সক্ষম হৈছে। বিশেষকৈ ক্লে’ কোৰ্টত তেওঁৰ আধিপত্য ইমানেই প্ৰবল আছিল যে ২০১০ চনৰ পৰা ২০১৪ চনলৈ একেৰাহে পাঁচবাৰকৈ তেওঁ ফ্ৰেন্স অ’পেনৰ খিতাপ দখল কৰিছিল। ইয়াৰ উপৰিও এটিপি (ATP) টুৰত ১০০০ তকৈয়ো অধিক মেচ জয়ৰ অভিলেখ গঢ়ি নাডালে টেনিছৰ ইতিহাসত নিজৰ নাম সোণালী আখৰেৰে খোদিত কৰিছে।
গ্ৰেণ্ড শ্লেমৰ লগতে অলিম্পিকৰ মঞ্চতো নাডালৰ প্ৰদৰ্শন আছিল অতুলনীয়। ২০০৮ চনৰ বেইজিং অলিম্পিকত পুৰুষৰ ছিংগলছত আৰু ২০১৬ চনৰ ৰিঅ’ অলিম্পিকত পুৰুষৰ ডাবলছত তেওঁ দেশৰ হৈ স্বৰ্ণ পদক জয় কৰিছিল। লগতে তেওঁৰ দখলত আছে ৩৬ টাকৈ এটিপি মাষ্টাৰ্ছ ১০০০ (ATP Masters 1000) খিতাপ, যিটো বিশ্ব টেনিছৰ ইতিহাসৰ অন্যতম শ্ৰেষ্ঠ পৰিসংখ্যা হিচাপে পৰিগণিত হৈছে। ডেভিছ কাপৰ জৰিয়তে নিজ দেশক প্ৰতিনিধিত্ব কৰি বিদায় ল’বলৈ ওলোৱা এইগৰাকী খেলুৱৈৰ অৱসৰৰ লগে লগে বিশ্ব টেনিছত এক অপূৰণীয় শূন্যতাৰ সৃষ্টি হ’ব বুলি ৰয়টাৰ্ছকে ধৰি বিভিন্ন আন্তঃৰাষ্ট্ৰীয় সংবাদ সংস্থাই মত প্ৰকাশ কৰিছে।
নিউজ ডেস্ক ৰিপৰ্ট, নতুন সময়
