● ৰাষ্ট্ৰীয় ঘাইপথ প্ৰাধিকৰণৰ গুৰুত্বপূৰ্ণ সিদ্ধান্ত
● এক্সপ্ৰেছৱে’ সম্পূৰ্ণ নহ’লে দিব নালাগে ২৫ শতাংশ অতিৰিক্ত কৰ
● অসম্পূৰ্ণ এক্সপ্ৰেছৱে’ত এতিয়াৰে পৰা নালাগে বৰ্ধিত টোল কৰ
● নিৰ্মীয়মান এক্সপ্ৰেছৱে’ত পুৰণি হাৰতহে দিব লাগিব টোল মাচুল
দেশৰ আন্তঃগাঁথনি খণ্ডত এক গুৰুত্বপূৰ্ণ পৰিৱৰ্তন আনি কেন্দ্ৰীয় চৰকাৰে নিৰ্মীয়মান অৱস্থাত থকা এক্সপ্ৰেছৱে’সমূহ ব্যৱহাৰ কৰা যাত্ৰীসকললৈ এক বিশেষ সকাহ কঢ়িয়াই আনিছে। ভাৰতীয় ৰাষ্ট্ৰীয় ঘাইপথ প্ৰাধিকৰণৰ শেহতীয়া সিদ্ধান্ত অনুসৰি, অহা ১৫ ফেব্ৰুৱাৰী, ২০২৬ৰ পৰা অসম্পূৰ্ণ বা আংশিকভাৱে মুকলি হোৱা এক্সপ্ৰেছৱে’সমূহত ভ্ৰমণ কৰিলে যাত্ৰীসকলে আৰু পূৰ্বৰ দৰে অতিৰিক্ত টোল কৰ ভৰিব নালাগিব। ইমানদিনে যাত্ৰীসকলে নিৰ্মাণ সম্পূৰ্ণ নোহোৱা পথৰ বাবেও অতিৰিক্ত প্রিমিয়াম মাচুল ভৰিবলগীয়া হোৱাত যি অসন্তুষ্টিৰ সৃষ্টি হৈছিল, সেয়া দূৰ কৰাৰ লক্ষ্যৰে চৰকাৰে ‘ৰাষ্ট্ৰীয় ঘাইপথ মাচুল বিধি’ৰ (National Highways Fee Rules) জৰিয়তে এই সংশোধন ঘটাইছে।
এই নতুন নিয়মাৱলী প্ৰণয়ন হোৱাৰ পূৰ্বে, এক্সপ্ৰেছৱে’সমূহৰ উন্নত মানদণ্ড, দ্ৰুত যাতায়াত আৰু সীমিত প্ৰৱেশৰ সুবিধাৰ বাবে সাধাৰণ ৰাষ্ট্ৰীয় ঘাইপথতকৈ ২৫ শতাংশ অধিক হাৰত টোল সংগ্ৰহ কৰা হৈছিল। সমস্যাটো আছিল যে, এক্সপ্ৰেছৱে’ এটাৰ নিৰ্মাণ সম্পূৰ্ণ নহ’লেও বা কেৱল কিছু অংশহে মুকলি হ’লেও ব্যৱহাৰকাৰীৰ পৰা সেই বৰ্ধিত হাৰতে টোল লৈ থকা হৈছিল। নতুন নিয়ম অনুসৰি, যেতিয়ালৈকে এটা এক্সপ্ৰেছৱে’ আৰম্ভণিৰ পৰা শেষলৈকে সম্পূৰ্ণৰূপে কাৰ্যকৰী নহয়, তেতিয়ালৈকে তাত কেৱল সাধাৰণ ৰাষ্ট্ৰীয় ঘাইপথৰ বাবে নিৰ্ধাৰিত মানক হাৰতহে টোল সংগ্ৰহ কৰিব পৰা যাব। অৰ্থাৎ যাত্ৰীসকলে এতিয়াৰে পৰা সেই ২৫ শতাংশ অতিৰিক্ত বোজা বহন কৰিব নালাগে।
কেন্দ্ৰীয় পথ পৰিবহণ মন্ত্ৰালয়ৰ দ্বাৰা জাৰি কৰা এই নিৰ্দেশনাৰ আঁৰত এক সুদূৰপ্ৰসাৰী কৌশল নিহিত হৈ আছে। বৰ্তমান বহু যাত্ৰীয়ে এক্সপ্ৰেছৱে’ৰ অত্যধিক টোলৰ পৰা বাচিবলৈ সমান্তৰালভাৱে থকা পুৰণি ৰাষ্ট্ৰীয় ঘাইপথসমূহ ব্যৱহাৰ কৰে, যাৰ ফলত সেই পথসমূহত প্ৰচণ্ড যান-জঁট আৰু প্ৰদূষণৰ সৃষ্টি হয়। আংশিকভাৱে মুকলি হোৱা এক্সপ্ৰেছৱে’সমূহৰ টোল হ্ৰাস কৰি চৰকাৰে সেইসমূহক যাত্ৰীৰ বাবে অধিক আকৰ্ষণীয় কৰি তুলিব বিচাৰিছে, যাতে পুৰণি ঘাইপথৰ ওপৰত হেঁচা কমে আৰু লজিষ্টিক খণ্ডৰ বাবে সামগ্ৰী পৰিবহণ দ্ৰুততৰ হয়।
১২ ফেব্ৰুৱাৰীৰ সন্ধিয়া প্ৰকাশিত চৰকাৰী অধিসূচনা অনুসৰি, এই সংশোধিত টোল ব্যৱস্থা ১৫ ফেব্ৰুৱাৰী, ২০২৬ৰ পৰা কাৰ্যকৰী হ’ব। এই বিশেষ ৰেহাই ব্যৱস্থা অহা এবছৰৰ বাবে অথবা সংশ্লিষ্ট এক্সপ্ৰেছৱে’টো সম্পূৰ্ণৰূপে কাৰ্যকৰী নোহোৱালৈকে বলবৎ থাকিব।
