‘জনাদেশ ২০২৪’- কাইলৈ ১৪টা সমষ্টিত ১৪৩ গৰাকী প্ৰাৰ্থীৰ ভাগ্য নির্ণয়ঃ অপেক্ষা আৰু কেইটামান ঘণ্টা

কাইলৈ অসমৰ ১৪টা সমষ্টিত মুঠ ১৪৩ গৰাকী প্ৰাৰ্থীৰ ভাগ্য নির্ণয় হ’ব। তিনিটা পৰ্যায়ত অনুষ্ঠিত হোৱা লোকসভা নিৰ্বাচনত কাজিৰঙা সমষ্টিত বিৰোধী মিত্ৰজোঁটৰ প্ৰাৰ্থী ৰ’জলিনা তিৰ্কীৰ বিপৰীতে বিজেপিৰ প্ৰাৰ্থী কামাখ্যা প্ৰসাদ তাছাই প্রতিদ্বন্দ্বিতা আগবঢ়াইছিল। যোৰহাট সমষ্টিত বিজেপিৰ প্ৰাৰ্থী তপন কুমাৰ গগৈৰ বিপৰীতে কংগ্ৰেছ দলৰ পৰা গৌৰৱ গগৈ, ডিব্ৰুগড় সমষ্টিত কেন্দ্ৰীয় মন্ত্ৰী তথা বিজেপি প্ৰাৰ্থী সর্বানন্দ সোণোৱালৰ প্ৰতিদ্বন্দ্বী অসম জাতীয় পৰিষদৰ প্ৰাৰ্থী লুৰিনজ্যোতি গগৈ, শোণিতপুৰত বিজেপিৰ জ্যেষ্ঠ নেতা ৰণজিৎ দত্তই প্রতিদ্বন্দ্বিতা আগবঢ়াইছে। বিজেপিৰ হৈ দৰং-ওদালগুৰিত সাংসদ দিলীপ শ‍ইকীয়া, কৰিমগঞ্জত কৃপানাথ মাল্লা, শিলচৰত পৰিমল শুক্লবৈদ্য, নগাঁৱত সুৰেশ বৰা আৰু ডিফুত অমৰ সিং টিছ’ৱে প্ৰতিদ্বন্দ্বিতা আগবঢ়াইছিল। ইয়াৰ বিপৰীতে নগাঁৱত কংগ্ৰেছ দলৰ প্ৰদ্যুৎ বৰদলৈ, শিলচৰত দলটোৰ প্ৰাৰ্থী সূর্যকান্ত সৰকাৰ, দৰং-ওদালগুৰিত মাধৱ ৰাজবংশী, কৰিমগঞ্জত হাফিজ ৰচিদ আহমেদ চৌধুৰী আৰু ডিফুত জয়ৰাম ইংলেঙে প্রতিদ্বন্দ্বিতা আগবঢ়াইছে। আনহাতে, গুৱাহাটী লোকসভা সমষ্টিত বিজেপিৰ হৈ বিজুলী কলিতা মেধি আৰু বিৰোধী মিত্ৰজোঁটৰ প্ৰাৰ্থী মীৰা বৰঠাকুৰে প্ৰতিদ্বন্দ্বিতা আগবঢ়াইছে। বৰপেটাত এন ডি এ মিত্ৰজোঁটৰ প্ৰাৰ্থী ফণীভূষণ চৌধুৰীৰ বিপৰীতে চি পি আই এমৰ হৈ মনোৰঞ্জন তালুকদাৰে প্ৰাৰ্থীত্ব আগবঢ়াইছে। ধুবুৰী সমষ্টিত বিৰোধী মিত্ৰজোঁটৰ ৰকিবুল হুছেইনৰ বিপৰীতে এ আই ইউ ডি এফৰ বদৰুদ্দিন আজমলে প্রতিদ্বন্দ্বিতা আগবঢ়াইছে। এতিয়া অপেক্ষা আৰু কেইটামান ঘণ্টা৷