- Advertisement -
● টি-২০ ক্ৰিকেটত ইতিহাস ৰচনা বিৰাট ক’হলিৰ
● ১৪ হাজাৰ ৰাণ সংগ্ৰহ কৰা প্ৰথমগৰাকী ভাৰতীয় বেটছমেন ক’হলি
● দ্ৰুততম ১৪ হাজাৰ টি-২০ ৰাণ সংগ্ৰহৰে ক্ৰিছ গেইলৰ অভিলেখ ভংগ ক’হলিৰ
নিউজ ডেস্ক,গুৱাহাটী
ৰয়েল চেলেঞ্জাৰ্ছ বেংগালুৰুৰ তাৰকা বেটছমেন বিৰাট ক’হলিয়ে T-20 ক্ৰিকেটত ১৪,০০০ ৰাণ সম্পূৰ্ণ কৰা প্ৰথমগৰাকী ভাৰতীয় হিচাপে পৰিগণিত হৈছে। বুধবাৰে নিশা ৰায়পুৰৰ শ্বহীদ বীৰ নাৰায়ণ সিং আন্তঃৰাষ্ট্ৰীয় ষ্টেডিয়ামত চলিত ইণ্ডিয়ান প্ৰিমিয়াৰ লীগৰ ৫৭ সংখ্যক মেচত কলকাতা নাইট ৰাইডাৰ্ছৰ বিৰুদ্ধে এই অভিলেখ অৰ্জন কৰে। একেৰাহে দুখন মেচত শূন্য ৰাণত আউট হোৱাৰ পিছত এক শক্তিশালী প্ৰত্যাৱৰ্তন কৰি ক’হলিয়ে ৬০ টা বলত ১০৫ ৰাণৰ অনবদ্য ইনিংছ খেলি দলক ৬ উইকেটৰ ব্যৱধানত জয়লাভ কৰোৱায়।
ক’হলি টি-২০ ফৰ্মেটত এই মাইলখুঁটি স্পৰ্শ কৰা বিশ্বৰ ষষ্ঠগৰাকী ক্ৰিকেটাৰ। মাত্ৰ ৪০৯ টা ইনিংছতে ১৪ হাজাৰ ৰাণ সম্পূৰ্ণ কৰি তেওঁ ক্ৰিছ গেইলৰ ৪২৩ ইনিংছৰ পূৰ্বৰ অভিলেখ ভংগ কৰি দ্ৰুততম বেটছমেনৰ স্বীকৃতি লাভ কৰিছে। বৰ্তমান গেইল, কাইৰণ প’লাৰ্ড, এলেক্স হেলছ, ডেভিদ ৱাৰ্ণাৰ আৰু জছ বাটলাৰহে সৰ্বাধিক টি-২০ ৰাণ সংগ্ৰহকাৰীৰ তালিকাত ক’হলিতকৈ আগত আছে। এই শতকটোৰ জৰিয়তে কোহলিয়ে আই পি এলত নৱম আৰু সামগ্ৰিকভাৱে টি-২০ কেৰিয়াৰত দশম শতক অৰ্জন কৰি এই কৃতিত্ব লাভ কৰা প্ৰথম ভাৰতীয় হিচাপেও পৰিগণিত হয়।
১৯৩ ৰাণৰ এক প্ৰত্যাহ্বানমূলক বিজয় লক্ষ্য অনুসৰণ কৰি বেংগালুৰুৱে ক’হলিৰ ১১ টা চাৰি আৰু ৩ টা ছয়েৰে সজোৱা বিস্ফোৰক শতক আৰু দেৱদত্ত পাডিক্কলৰ ৩৯ ৰাণৰ সহায়ত ৫ টা বল বাকী থাকোতেই মেচখনত সহজ জয় সাব্যস্ত কৰে। ডিফেণ্ডিং চেম্পিয়ন বেংগালুৰুৰ এই জয়ে প্ৰতিযোগিতাখনত দলটোৰ স্থিতি অধিক শক্তিশালী কৰাৰ লগতে ক্ৰিকেট বিশ্বৰ অন্যতম শ্ৰেষ্ঠ বেটছমেনগৰাকীৰ ফৰ্মলৈ প্ৰত্যাৱৰ্তনে সামগ্ৰিকভাৱে ক্ৰীড়ামহলত ইতিবাচক প্ৰভাৱ পেলাইছে।
- Advertisement -
