- মহাৰাষ্ট্ৰ চৰকাৰৰ মুখ্যমন্ত্ৰী, উপ-মুখ্যমন্ত্ৰীৰ মাজত শীতল যুদ্ধ আৰম্ভ
- একনাথ সিন্দেৰ মন্তব্য ‘২০২২ চনত মই পূৰ্বৰ চৰকাৰ সলনি কৰিছিলোঁ’
- সিন্দেৰ ৰাজহুৱা বক্তব্য ‘মোক কোনেও সহজভাৱে লোৱা উচিত নহয়৷’
‘মোক কোনেও সহজভাৱে লোৱা উচিত নহয়৷ মই এজন ৰাজনৈতিক কৰ্মী, এজন সাধাৰণ ৰাজনৈতিক কৰ্মী৷ কিন্তু মই বালাচাহেব থাকৰে আৰু আনন্দ দিঘেৰ ৰাজনৈতিক কৰ্মী৷ সেই কথা সকলোৱে বুজি পোৱা উচিত৷ ২০২২ চনত যেতিয়া মোক সহজভাৱে লোৱা হৈছিল, তেতিয়া মই পূৰ্বৰ চৰকাৰখনক উৎখাত কৰাৰ দিসত আগবঢ়িছিলোঁ৷ চৰকাৰ সলনি কৰিলোঁ৷ সাধাৰণ ৰাইজৰ অন্তৰত থকা চৰকাৰখনক মই ক্ষমতালৈ আনিলোঁ৷ মোক সহজভাৱে লোৱা উচিত নহয়৷ এই বক্তব্য মহাৰাষ্ট্ৰৰ উপ-মুখ্যমন্ত্ৰী একনাথ সিন্দেৰ৷ সংঘাত আৰম্ভ হৈছে মহাৰাষ্ট্ৰৰ ৰাজনীতিত৷ পুনৰ এইবাৰ নেতৃত্বত একনাথ সিন্দে৷
২০২২ চনৰ জুনত শিৱসেনাৰ জ্যেষ্ঠ নেতা একনাথ সিন্দেৰ নেতৃত্বত শিৱসেনাৰ গৰিষ্ঠ সংখ্যক বিধায়কক লগতলৈ বিজেপিৰে মিত্ৰতা কৰি মহাৰাষ্ট্ৰৰ মুখ্যমন্ত্ৰী হয়৷ ২০২৪ৰ বিধানসভা নিৰ্বাচনৰ ফলাফলৰ পিছত একনাথ সিন্দেক মুখ্যমন্ত্ৰীৰ পৰিৱৰ্তে উপ-মুখ্যমন্ত্ৰীৰ দায়িত্ব দি বিজেপি নেতা দেৱেন্দ্ৰ ফাডনাভিছ মুখ্যমন্ত্ৰী হয়৷ সংঘাত আৰম্ভ হয় সেই মুহূৰ্তৰ পৰাই৷
মহাৰাষ্ট্ৰৰ বিধানসভাৰ ২৪৪খন আসনৰ ভিতৰত বিজেপিৰ ১৩২খন, সিন্দে শিৱসেনাৰ ৫৭ খন আৰু এন চি পি অজিত পাৱাৰ গ্ৰুপৰ ৪১ খন৷ বৰ্তমান মহাৰাষ্ট্ৰৰ মুখ্যমন্ত্ৰী দেৱেন্দ্ৰ ফাডনাভিছ আৰু উপ-মুখ্যমন্ত্ৰী একনাথ সিন্দেৰ মাজত শীতল যুদ্ধ আৰম্ভ হৈছে৷ মুখ্যমন্ত্ৰীয়ে আহ্বান কৰা বহুকেইখন বৈঠকত উপস্থিত থকাৰ পৰা বিৰত আছে সিন্দে৷ ক্ষমতাৰ যুঁজে লাহে লাহে তীব্ৰৰূপ ধাৰণ কৰিছে৷ মুখ্যমন্ত্ৰী আৰু উপ-মুখ্যমন্ত্ৰীয়ে এক সমান্তৰাল চৰকাৰ পৰিচালনা কৰা পৰিলক্ষিত হৈছে৷ সিন্দেৰ সমস্যাটো হ’ল মুখ্যমন্ত্ৰী হৈ আহি এতিয়া উপ-মুখ্যমন্ত্ৰী হ’ব লগা হ’ল৷ সিন্দেই এতিয়াও ৰাজনৈতিক পৰিৱেশ উপলব্ধি কৰিব পৰা নাই৷ মুখ্যমন্ত্ৰী আৰু দুজনকৈ উপ-মুখ্যমন্ত্ৰীৰ মাজত তিনিটা দিশেৰে গতি কৰিছে মহাৰাষ্ট্ৰৰ ৰাজনীতি৷ ১০০ দিন পূৰ্ণ নহওতে শীতল যুদ্ধ আৰম্ভ৷ চৰকাৰ পৰিচালনা কৰাতকৈ নিজস্ব দলীয় দৃষ্টিভংগীৰে আৰম্ভ হৈছে মহাৰাষ্ট্ৰৰ ৰাজনীতি৷
আবেগিক মিত্ৰতা নে প্ৰকটিকেল মিত্ৰতা৷ ঐক্যবদ্ধভাৱে সিদ্ধান্ত গ্ৰহণ কৰিব নোৱাৰ বাবে সংঘাত তীব্ৰৰূপ ধাৰণ কৰিছে৷ মহাৰাষ্ট্ৰৰ ৰাজনৈতিক ক্ষেত্ৰত আলোচনাৰ বিষয় হৈ পৰিছে যে সিন্দেই মুখ্যমন্ত্ৰী থকা সময়ত আৱৰ্তন দিয়া ১৪০০ কোটিৰ কাম মুখ্যমন্ত্ৰী ফাডনাভিছে বাতিল কৰি দিছে৷ আৰু ২০ গৰাকী সিন্দেৰ দলৰ বিধায়কৰ নিৰাপত্তা ব্যৱস্থা কৰ্তন কৰিছে৷
এতিয়া লক্ষ্যণীয় হৈ পৰিছে মহাৰাষ্ট্ৰৰ ৰাজনীতি৷
