● অগ্নিকুণ্ডলৈ পৰিণত হ’ব নেকি পৃথিৱী?
● ২০৫০ চনলৈ ৩.৭৯ বিলিয়ন লোকৰ জীৱনলৈ নামিব দুৰ্যোগ
● শীতপ্ৰধান দেশতো বাঢ়িব অসহ্যকৰ গৰম
● জলবায়ুৰ ৰোষত দৰিদ্ৰ দেশসমূহ
● অক্সফ’ৰ্ডৰ গৱেষণাত উন্মোচিত হ’ল ভৱিষ্যতৰ ভয়াৱহ ছবি
নিউজ ডেস্ক ৰিপৰ্ট,নতুন সময়ঃ পৃথিৱী ক্ৰমান্বয়ে এক জ্বলন্ত অগ্নিকুণ্ডলৈ পৰিণত হ’বলৈ গৈ আছে, আৰু এই পৰিৱৰ্তন আমাৰ ধাৰণাতকৈও অধিক ক্ষিপ্ৰতৰ। অক্সফৰ্ড বিশ্ববিদ্যালয়ৰ গৱেষকসকলে শেহতীয়াকৈ ‘নেচাৰ চাষ্টেইনেবিলিটি’ (Nature Sustainability) পত্ৰিকাত প্ৰকাশ কৰা এক প্ৰতিবেদন অনুসৰি, বৰ্তমানৰ হাৰত জীৱাশ্ম ইন্ধনৰ ব্যৱহাৰ অব্যাহত থাকিলে ২০৫০ চনৰ ভিতৰত বিশ্বৰ প্ৰায় আধা জনসংখ্যাই চৰম উষ্ণতাৰ কবলত পৰিব। ২০১০ চনত বিশ্বৰ ২৩ শতাংশ লোক এনে বিপদজনক উষ্ণতাৰ ভুক্তভোগী আছিল, কিন্তু আগন্তুক ডেৰ-দুই দশকৰ ভিতৰত এই সংখ্যা ৪১ শতাংশলৈ বৃদ্ধি পোৱাৰ আশংকা কৰা হৈছে, যিয়ে প্ৰায় ৩.৭৯ বিলিয়ন মানুহৰ জীৱন বিপন্ন কৰি তুলিব। গোলকীয় উষ্ণতা বৃদ্ধি ২ ডিগ্ৰী ছেলচিয়াছ অতিক্ৰম কৰিলে আমাৰ পৰিৱেশ তন্ত্ৰই কেনে ভয়াৱহ ৰূপ ধাৰণ কৰিব পাৰে, এই গৱেষণাই তাৰেই এক বাস্তৱ ছবি দাঙি ধৰিছে।
এই জলবায়ু পৰিৱৰ্তনৰ আটাইতকৈ বেছি কু-ফল ভোগ কৰিবলগীয়া হ’ব বিশ্বৰ ক্ৰান্তীয় (Tropical) অঞ্চলৰ দেশসমূহে, য’ত দৰিদ্ৰ আৰু উন্নয়নশীল ৰাষ্ট্ৰৰ সংখ্যাই অধিক। গৱেষণাটোৰ লগত সংলগ্ন তথ্য অনুসৰি,
চৰম গৰমৰ বাবে ‘কুলিং ডিগ্ৰী ডেজ’ (CDD) বা ঘৰ ঠাণ্ডা ৰখাৰ প্ৰয়োজনীয়তা সৰ্বাধিক বৃদ্ধি পাব চেন্ট্ৰেল আফ্ৰিকান ৰিপাব্লিকত। এই অঞ্চলত বৃদ্ধিৰ হাৰ হ’ব প্ৰায় ১৯.৬ শতাংশ।
ইয়াৰ পাছতে আছে নাইজেৰিয়া, দক্ষিণ চুডান আৰু লাওছৰ দৰে দেশ। মন কৰিবলগীয়া যে, ভাৰতবৰ্ষৰ গড় উষ্ণতা এই তালিকাত শীৰ্ষত নাথাকিলেও, বিশাল জনসংখ্যাৰ বাবে ভাৰতৰ সৰ্বাধিক সংখ্যক লোক এই অসহ্যকৰ গৰমৰ ভুক্তভোগী হ’ব। আনহাতে, উত্তৰ গোলাৰ্ধৰ চুইডেন, ন’ৰৱে বা ব্ৰিটেইনৰ দৰে যিবোৰ দেশত ঘৰবোৰ সাধাৰণতে তাপ ধৰি ৰাখিবলৈ সজা হয়, সেই দেশবোৰতো গৰমৰ প্ৰকোপ অসহনীয় হৈ পৰিব আৰু আন্তঃগাঁথনিৰ বিসংগতিয়ে জনজীৱন বিপৰ্যস্ত কৰিব।
কেৱল শাৰীৰিক অসুস্থতাই নহয়, এই চৰম উষ্ণতাই বিশ্ব অৰ্থনীতিতো এক ডাঙৰ মোক্ষম আঘাত হানিব। এই সন্দৰ্ভত আন্তঃৰাষ্ট্ৰীয় শ্ৰমিক সংস্থাৰ এক প্ৰতিবেদনত উল্লেখ কৰা হৈছে যে অত্যধিক গৰমৰ বাবে ২০৩০ চনৰ ভিতৰত বিশ্বজুৰি কৰ্মঘণ্টা হ্ৰাস পোৱাৰ ফলত প্ৰায় ৮০ নিযুত পূৰ্ণকালীন চাকৰিৰ সমপৰিমাণ লোকচান হ’ব পাৰে, যিয়ে প্ৰধানকৈ কৃষি আৰু নিৰ্মাণ খণ্ডক ধ্বংসৰ গৰাহলৈ ঠেলি দিব। অক্সফৰ্ডৰ গৱেষণাটোৱেও একেই ইংগিত দিছে যে উষ্ণতা বৃদ্ধিৰ এই ধাৰাই মানুহৰ স্বাস্থ্যৰ পৰা আৰম্ভ কৰি শিক্ষা, কৃষি আৰু প্ৰব্ৰজনলৈকে সকলো দিশতে নেতিবাচক প্ৰভাৱ পেলাব, যাৰ বাবে দৰিদ্ৰ দেশবোৰৰ সামাজিক সুৰক্ষা ব্যৱস্থা ভাঙি পৰাৰ উপক্ৰম হ’ব।
গৱেষক ড০ ৰাধিকা খোছলা আৰু ড০ জেছুছ লিজানাই সতৰ্ক কৰি দিছে যে আমি ইতিমধ্যে বিপদসীমাৰ একেবাৰে ওচৰত আছো। জলবায়ু পৰিৱৰ্তনৰ বিৰুদ্ধে যুঁজ দিয়াটো এতিয়া কেৱল ভৱিষ্যতৰ পৰিকল্পনা নহয়, বৰং বৰ্তমানৰ জৰুৰীকালীন পদক্ষেপ। তেওঁলোকৰ মতে, ১.৫ ডিগ্ৰী ছেলচিয়াছৰ তলত উষ্ণতা বৃদ্ধি ধৰি ৰাখিবলৈ হ’লে ৰাজনেতাসকলে ‘নেট জিৰ’ (Net Zero) বা শূন্য কাৰ্বন নিৰ্গমনৰ লক্ষ্যত উপনীত হ’বলৈ জৰুৰী ব্যৱস্থা গ্ৰহণ কৰিবই লাগিব। অন্যথা, অহা কেইটামান বছৰৰ ভিতৰতে আমি এনে এক পৰিস্থিতিৰ সন্মুখীন হ’ম য’ত শীতাতাপ নিয়ন্ত্ৰণ যন্ত্ৰই আমাক সকাহ দিব নোৱাৰিব আৰু ‘চৰম উষ্ণতা’ বাতৰিৰ শিৰোনাম নহৈ দৈনন্দিন জীয়াই থকাৰ সংগ্ৰাম হৈ পৰিব।
