● আহমেদাবাদত ভাৰতীয় ক্ৰিকেট দলৰ বিপৰ্যয়
● দক্ষিণ আফ্ৰিকাৰ বিৰুদ্ধে শোচনীয় পৰাজয় ঘটিল ভাৰতৰ
● টি-২০ বিশ্বকাপৰ ছেমিফাইনেলত প্ৰৱেশ কৰিবলৈ ভাৰতৰ সন্মুখত এতিয়া জটিল প্ৰত্যাহ্বান
আহমেদাবাদত অনুষ্ঠিত টি-২০ বিশ্বকাপ ২০২৬-ৰ ছুপাৰ এইটৰ প্ৰথমখন মেচত দক্ষিণ আফ্ৰিকাৰ হাতত ৭৬ ৰানৰ বৃহৎ ব্যৱধানত পৰাস্ত হোৱাৰ লগে লগে ভাৰতৰ ছেমিফাইনেলত প্ৰৱেশৰ আশা ম্লান পৰিছে। দেওবাৰে নিশা অনুষ্ঠিত এই গুৰুত্বপূৰ্ণ মেচখনত সূৰ্যকুমাৰ যাদৱৰ নেতৃত্বাধীন ভাৰতীয় দলটোৱে নিজৰ আধিপত্য বিস্তাৰ কৰিব নোৱাৰিলে। প্ৰথমে বেটিং কৰি দক্ষিণ আফ্ৰিকাই নিৰ্ধাৰিত ২০ অ’ভাৰত ৭ উইকেট হেৰুৱাই ১৮৭ ৰানৰ এক প্ৰত্যাহ্বানমূলক স্ক’ৰ থিয় কৰোৱাৰ বিপৰীতে ভাৰতীয় দলটো মাত্ৰ ১১১ ৰানতে অল-আউট হয়।
খেলখনৰ আৰম্ভণিৰ পৰাই দক্ষিণ আফ্ৰিকাৰ বেটছমেনসকলে আক্ৰমণাত্মক স্থিতি গ্ৰহণ কৰিছিল। ডেভিদ মিলাৰৰ দৰ্শনীয় ৬৩ ৰান আৰু ডেৱাল্ড ব্ৰেভিছৰ বিস্ফোৰক ৪৫ ৰানৰ সহায়ত দলটোৱে এই বৃহৎ স্ক’ৰ সংগ্ৰহ কৰিবলৈ সক্ষম হয়। ভাৰতৰ হৈ যশপ্ৰীত বুমৰাহে মাত্ৰ ১৫ ৰান দি ৩টা উইকেট দখল কৰি একমাত্ৰ সফল বলাৰ হিচাপে পৰিগণিত হয় যদিও বাকী বলাৰসকলৰ ব্যৰ্থতাই দলটোক বিপদত পেলায়। ১৮৮ ৰানৰ বিজয় লক্ষ্য আগত লৈ বেটিং কৰিবলৈ অহা ভাৰতীয় বেটিং ক্ৰম দক্ষিণ আফ্ৰিকাৰ মাৰ্কো জান্সেনৰ বিধ্বংসী বলিং স্পেলৰ সন্মুখত সম্পূৰ্ণৰূপে খহি পৰে আৰু জান্সেনে অকলেই ৪টা গুৰুত্বপূৰ্ণ উইকেট দখল কৰে।
এই পৰাজয়ৰ পিছত ছেমিফাইনেলত নিজৰ স্থান সুৰক্ষিত কৰিবলৈ ভাৰতে এতিয়া বাকী থকা দুয়োখন মেচতে জয়লাভ কৰাটো অপৰিহাৰ্য হৈ পৰিছে। অহা ২৬ ফেব্ৰুৱাৰীত চেন্নাইত জিম্বাবৱেৰ বিৰুদ্ধে আৰু ১ মাৰ্চত কলকাতাত ৱেষ্ট ইণ্ডিজৰ বিৰুদ্ধে ভাৰতে অৱতীৰ্ণ হ’ব। যদি ভাৰতে দুয়োখন মেচত জয়লাভ কৰে, তেন্তে মুঠ পইণ্ট হ’ব ৪ আৰু ছেমিফাইনেলৰ পথ প্ৰায় মুকলি হ’ব। কিন্তু, যদি দক্ষিণ আফ্ৰিকাই বাকী দুখন মেচৰ এখনত হাৰে আৰু ২৩ ফেব্ৰুৱাৰীত অনুষ্ঠিত হ’বলগীয়া ৱেষ্ট ইণ্ডিজ-জিম্বাবৱে মেচৰ বিজয়ী দলেও দক্ষিণ আফ্ৰিকাক পৰাস্ত কৰে, তেন্তে তিনিটা দলৰ পইণ্ট সমান হ’ব আৰু তেনে পৰিস্থিতিত দলসমূহৰ নেট ৰান ৰেট নিৰ্ণায়ক কাৰক হৈ পৰিব।
আনহাতে, যদি ভাৰতে আগন্তুক দুখন মেচৰ মাত্ৰ এখনতহে জয়লাভ কৰিবলৈ সক্ষম হয়, তেন্তে পৰিস্থিতি অধিক জটিল হৈ পৰিব আৰু ভাৰতৰ ছেমিফাইনেলৰ আশা কেৱল আন মেচসমূহৰ ফলাফলৰ ওপৰত নিৰ্ভৰ কৰিব। এই ক্ষেত্ৰত ভাৰতে আশা কৰিব লাগিব যাতে দক্ষিণ আফ্ৰিকাই তেওঁলোকৰ বাকী থকা আটাইকেইখন মেচত জয়লাভ কৰে। লগতে, ভাৰতৰ একমাত্ৰ জয়টো ৱেষ্ট ইণ্ডিজ আৰু জিম্বাবৱেৰ মাজৰ মেচখনৰ বিজয়ী দলটোৰ বিৰুদ্ধে আহিব লাগিব। এনে অৱস্থাত ভাৰত, জিম্বাবৱে আৰু ৱেষ্ট ইণ্ডিজ তিনিওটা দলৰে পইণ্ট ২-ত সীমাবদ্ধ থাকিব আৰু পুনৰ নেট ৰান ৰেটৰ (NRR) ওপৰত ভিত্তি কৰিহে ছেমিফাইনেলৰ টিকট নিশ্চিত হ’ব।
