● NEET পৰীক্ষাৰ্থীলৈ সকাহ
● আবেদনৰ সময়সীমা বৃদ্ধি কৰিলে নেচনেল টেষ্টিং এজেন্সীয়ে
● ১১ মাৰ্চলৈ বৃদ্ধি পঞ্জীয়নৰ সময়সীমা
নিউজ ডেস্ক ৰিপৰ্ট,নতুন সময় : চিকিৎসা বিজ্ঞানৰ স্নাতক পাঠ্যক্ৰমত নামভৰ্তিৰ বাবে ইচ্ছুক ছাত্ৰ-ছাত্ৰীসকলৰ প্ৰতি সঁহাৰি জনাই নেচনেল টেষ্টিং এজেন্সীয়ে (NTA) নিট ইউজি ২০২৬ (NEET UG 2026) পৰীক্ষাৰ অনলাইন পঞ্জীয়নৰ সময়সীমা অহা ১১ মাৰ্চলৈ বৃদ্ধি কৰিছে। দেশৰ বিভিন্ন প্ৰান্তৰ শিক্ষাৰ্থীৰ অনুৰোধৰ পৰিপ্ৰেক্ষিতত গ্ৰহণ কৰা এই সিদ্ধান্ত অনুসৰি, আগ্ৰহী প্ৰাৰ্থীসকলে ১১ মাৰ্চৰ নিশা ৯ বজালৈকে আবেদন দাখিল কৰিব পাৰিব আৰু নিশা ১১:৫০ বজালৈকে নিৰ্ধাৰিত মাচুল আদায় দিব পাৰিব। এই গুৰুত্বপূৰ্ণ সিদ্ধান্তই কাৰিকৰী বা অন্য কাৰণত আবেদন কৰিবলৈ বাকী থকা হেজাৰ হেজাৰ ছাত্ৰ-ছাত্ৰীক এক বৃহৎ সকাহ প্ৰদান কৰিছে।
আগ্ৰহী প্ৰাৰ্থীসকলে ৱেবছাইট neet.nta.nic.in ত গৈ এই পঞ্জীয়ন প্ৰক্ৰিয়া সম্পূৰ্ণ কৰিব লাগিব। আবেদন প্ৰক্ৰিয়াত প্ৰাৰ্থীসকলে নিজৰ ব্যক্তিগত তথ্য, শৈক্ষিক অৰ্হতা আৰু প্ৰয়োজনীয় নথিপত্ৰসমূহ নিৰ্ভুলভাৱে আপল’ড কৰিব লাগিব। পঞ্জীয়নৰ বাবে সাধাৰণ শ্ৰেণীৰ প্ৰাৰ্থীয়ে ১৭০০ টকা, সাধাৰণ-ইডব্লিউএছ শ্ৰেণীয়ে ১৬০০ টকা আৰু অনুসূচিত জাতি, জনজাতি তথা দিব্যাংগ প্ৰাৰ্থীসকলে ১০০০ টকাৰ নিৰ্ধাৰিত মাচুল পৰিশোধ কৰিব লাগিব।
এই পৰীক্ষাত অৱতীৰ্ণ হ’বলৈ প্ৰাৰ্থীসকলে পদাৰ্থ বিজ্ঞান, ৰসায়ন বিজ্ঞান, জীৱ বিজ্ঞান বা বায়’টেকনলজি আৰু ইংৰাজী বিষয়ত দ্বাদশ শ্ৰেণী উত্তীৰ্ণ হোৱা বা চলিত বৰ্ষত অৱতীৰ্ণ হোৱাটো বাধ্যতামূলক। শিক্ষাগত অৰ্হতাৰ ক্ষেত্ৰত সাধাৰণ শ্ৰেণীৰ বাবে নূন্যতম ৫০ শতাংশ, দিব্যাংগৰ বাবে ৪৫ শতাংশ আৰু সংৰক্ষিত শ্ৰেণীৰ বাবে ৪০ শতাংশ নম্বৰ নিৰ্ধাৰণ কৰা হৈছে। ইয়াৰ লগতে, প্ৰাৰ্থীৰ বয়স ২০২৬ চনৰ ৩১ ডিচেম্বৰলৈকে ন্যূনতম ১৭ বছৰ হ’ব লাগিব (অৰ্থাৎ জন্ম তাৰিখ ৩১ ডিচেম্বৰ ২০০৯ বা তাৰ পূৰ্বৰ হ’ব লাগিব) যদিও বৰ্তমানলৈকে পৰীক্ষাত অৱতীৰ্ণ হোৱাৰ কোনো সৰ্বোচ্চ বয়সৰ সীমা সংস্থাই নিৰ্ধাৰণ কৰা নাই।
সমগ্ৰ ভাৰতবৰ্ষৰ চৰকাৰী আৰু ব্যক্তিগত চিকিৎসা মহাবিদ্যালয়সমূহত এম বি বি এছ, বি ডি এছ, আৰু আয়ুষকে ধৰি বিভিন্ন স্নাতক পাঠ্যক্ৰমত নামভৰ্তিৰ একমাত্ৰ প্ৰৱেশদ্বাৰ হিচাপে পৰিগণিত এই পৰীক্ষা অহা ৩ মে’ত অনুষ্ঠিত হোৱাৰ সম্ভাৱনা আছে। অফলাইন যোগে পৰম্পৰাগত পেন-আৰু-পেপাৰ মাধ্যমত অনুষ্ঠিত হ’বলগীয়া এই পৰীক্ষাত প্ৰতিটো ৪ নম্বৰৰ মুঠ ১৮০ টা প্ৰশ্ন থাকিব। চৰকাৰী জাননী আৰু ৱেবছাইটৰ (https://neet.nta.nic.in/) তথ্যৰ আধাৰত প্ৰস্তুত কৰা এই প্ৰতিবেদন অনুসৰি, প্ৰাৰ্থীসকলক শেষ মুহূৰ্তৰ অসুবিধাৰ পৰা হাত সাৰিবলৈ সময়সীমা উকলি যোৱাৰ পূৰ্বেই নিৰ্ধাৰিত প্ৰক্ৰিয়া সম্পন্ন কৰিবলৈ আহ্বান জনোৱা হৈছে।
