- Advertisement -
➥ প্ৰাৰ্থী হিচাপে নাম ঘোষণা হোৱাৰ পিছত প্ৰথমবাৰৰ বাবে যোৰহাটত উপস্থিত গৌৰৱ গগৈ
➥ দলীয় কৰ্মীসকলক অহা ৩০ দিনৰ ভিতৰত ঘৰে ঘৰে গৈ প্ৰচাৰ অভিযান চলাবলৈ আহ্বান গগৈৰ
➥ এতিয়াও সময় শেষ হৈ যোৱা নাই, ৰাইজৰ দলৰে মিত্ৰতাক লৈ মই আশাবাদীঃ গৌৰৱ গগৈ
গুৱাহাটী, ৭ মাাৰ্চঃ যোৰহাট বিধানসভা সমষ্টিৰ কংগ্ৰেছ দলৰ প্ৰাৰ্থী হিচাপে নাম ঘোষণা হোৱাৰ পিছত আজি প্ৰথমবাৰৰ বাবে গৃহ চহৰখনত উপস্থিত হয় অসম প্ৰদেশ কংগ্ৰেছ কমিটিৰ সভাপতি গৌৰৱ গগৈ। যোৰহাটত উপস্থিত হোৱাৰ লগে লগে জিলা কংগ্ৰেছ কমিটিৰ নেতা-কৰ্মী আৰু স্থানীয় ৰাইজে প্ৰদেশ কংগ্ৰেছৰ সভাপতি তথা যোৰহাট বিধানসভা সমষ্টিৰ দলীয় প্ৰাৰ্থীগৰাকীক উষ্ম আদৰণি জনায়। নেতা-কৰ্মী আৰু স্থানীয় ৰাইজৰ আদৰণি গ্ৰহণ কৰি অভিভূত হৈ পৰে গৌৰৱ গগৈ। ইয়াৰ পিছতে সভাপতি গৌৰৱ গগৈয়ে টীয়ক বিধানসভা সমষ্টিত কংগ্ৰেছ দলৰ প্ৰাৰ্থিত্ব লাভ কৰা পল্লৱী শইকীয়া গগৈক সাক্ষাৎ কৰি শুভেচ্ছা জ্ঞাপন কৰে। ইফালে, সাংবাদিকৰে হোৱা বাৰ্তালাপত গৌৰৱ গগৈয়ে কয় যে ৰাজ্যসভা নিৰ্বাচনৰ বাবে বিধানসভা নিৰ্বাচনৰ দিন আনুষ্ঠানিকভাৱে ঘোষণা কৰা হোৱা নাই যদিও বিহুৰ আগতে নিৰ্বাচন অনুষ্ঠিত হোৱাৰ পূৰ্ণ সম্ভাৱনা আছে। গগৈয়ে কয়, ”আমাৰ হাতত মাত্ৰ ৩০ দিন আছে। এই ৩০ দিন যথেষ্ট মূল্যৱান। এইকেইদিনত প্ৰত্যেকদিনাই আমাৰ কৰ্মীসকলক ঘৰে ঘৰে যাবলৈ অনুৰোধ জনাইছো।’’ সভাপতি গগৈয়ে আৰু কয় যে, ৰাইজে পৰিৱৰ্তন বিচাৰে। সেয়ে আমাৰ কংগ্ৰেছ দলৰ সময় পৰিৱৰ্তন যাত্ৰাত ৰাইজে আমাক যথেষ্ট আশীৰ্বাদ প্ৰদান কৰিছে। তেওঁ কয়, ”আজি অসমৰ মানুহে মুক্ত মনে কথা ক’বলৈ ভয় কৰা হৈছে। অসমত কেৱল এটা পৰিয়ালৰহে দোপতদোপে উন্নতি হৈছে। সমগ্ৰ অসমতে সেই বিশেষ পৰিয়ালটোৱে ১২ হাজাৰ বিঘা মাটি দখল কৰিবলৈ সক্ষম হৈছে। গাঁৱৰ ভিতৰত মদৰ দোকানৰ সংখ্যা বৃদ্ধি পাইছে। চৰকাৰী বিদ্যালয়বোৰ বন্ধ কৰি দিয়া হৈছে।’’ তেওঁ আৰু কয় যে অসমৰ ৰাইজে হিমন্ত বিশ্ব শৰ্মাক মুখ্যমন্ত্ৰীৰ চকীৰ পৰা আঁতৰাব বিচাৰে। কাৰণ হিমন্ত বিশ্ব শৰ্মাই বাৰম্বাৰ মুখ্যমন্ত্ৰীৰ আসনখনৰ মৰ্যাদা হানি কৰি আহিছে। আনহাতে বিৰোধীৰ মিত্ৰতা সন্দৰ্ভতো তাৎপৰ্যপূৰ্ণ মন্তব্য কৰে প্ৰদেশ কংগ্ৰেছৰ সভাপতিগৰাকীয়ে। গগৈয়ে কয়, ”বিৰোধী মিত্ৰতাক লৈ মই আশাবাদী। তিনিটা দলৰ সৈতে কালি আমি একেলগে সংবাদমেলো কৰিলো। তেওঁলোকৰ সৈতে কিছুদিনৰ ভিতৰতে আমি একেলগে প্ৰচাৰ অভিযানলৈ ওলাই যাম। অসমৰ বিভিন্ন ঠাইত আমি লগ হৈ ৰাজহুৱা সভাত অংশগ্ৰহণ কৰিম।’’ ৰাইজৰ দলৰ সৈতে মিত্ৰতা হ’ব নে নাই সেই সন্দৰ্ভত সাংবাদিকে প্ৰশ্ন কৰাত গগৈয়ে কয়, ”মই এতিয়াও আশাবাদী। নিশ্চয়কৈ অচিৰেই কথাবোৰ মিলি আহিব।’’ অখিল গগৈয়ে শেষ চেষ্টাও ব্যৰ্থ বুলি ফেচবুকত দিয়া পোষ্ট সন্দৰ্ভত সোধাত গগৈয়ে কয়, ”মই এতিয়াও হতাশ হোৱা নাই। মিত্ৰতা হ’ব বুলি মই এতিয়াও আশাবাদী। নিশ্চয় অলপ সময় লৈছে। কিন্তু এতিয়াও সময় শেষ হৈ যোৱা নাই।’’
- Advertisement -
