▪️অসমত এতিয়া বিজেপি নাই, বিজেপিৰ লেবেল লগোৱা হিমন্ত বিশ্ব শৰ্মাৰ নেতৃত্বৰ কংগ্ৰেছহে আছেঃ গৌৰৱ গগৈ
▪️”যিসকল নেতাৰ বাবে ৰাইজে কংগ্ৰেছক বেয়া পাইছিল সেইসকল কংগ্ৰেছী নেতা এতিয়া বাজপেয়ী ভৱনত একত্ৰিত হৈছে’’
▪️”এইবাৰৰ নিৰ্বাচনী যুঁজ হিমন্ত বিশ্বৰ নেতৃত্বৰ দাগী কংগ্ৰেছী আৰু তৰুণ গগৈৰ আদৰ্শৰ নতুন কংগ্ৰেছৰ মাজত হ’ব’’
▪️মাজুলীত কংগ্ৰেছ দলৰ মনোনীত প্ৰাৰ্থী ড০ ইন্দ্ৰনীল পেগুৰ হৈ নিৰ্বাচনী প্ৰচাৰ প্ৰদেশ কংগ্ৰেছৰ সভাপতি গৌৰৱ গগৈৰ
গুৱাহাটী, ২১ মাৰ্চঃ ‘সন্মুখত আছে হিমন্ত বিশ্ব শৰ্মাৰ নেতৃত্বৰ কংগ্ৰেছ, বিজেপি মাত্ৰ এটা টেগ হে। তৰুণ গগৈৰ দিনত বেয়া কাম কৰা কংগ্ৰেছী নেতা আজি বিজেপিত আছে। এই নিৰ্বাচনী যুঁজখন হ’ব তৰুণ গগৈ নেতৃত্বাধীন কংগ্ৰেছ আৰু হিমন্ত বিশ্ব শৰ্মাৰ নেতৃত্বাধীন কংগ্ৰেছৰ মাজত।’- মাজুলীত ভাৰতীয় জাতীয় কংগ্ৰেছ দলৰ প্ৰাৰ্থী ড০ ইন্দ্ৰনীল পেগুৰ হৈ আজি নিৰ্বাচনী প্ৰচাৰ চলোৱাৰ মাজতে সংবাদ মাধ্যমৰে হোৱা বাৰ্তালাপত এইদৰে কয় অসম প্ৰদেশ কংগ্ৰেছ কমিটিৰ সভাপতি গৌৰৱ গগৈয়ে। প্ৰদেশ কংগ্ৰেছৰ সভাপতিগৰাকীয়ে আৰু কয়, ”অসমত এতিয়া বিজেপি নাই। অসমত এতিয়া বিজেপিৰ লেবেল লগোৱা হিমন্ত বিশ্ব শৰ্মাৰ নেতৃত্বৰ কংগ্ৰেছহে আছে। তেওঁৰ নেতৃত্বত বাজপেয়ী ভৱনত একাংশ প্ৰাক্তন কংগ্ৰেছীয়ে নিজৰ আৰু নিজৰ পৰিয়ালৰ স্বাৰ্থত নিৰ্বাচন খেলিবলৈ উঠি-পৰি লাগিছে। বিপৰীতে আমাৰ লগত আছে তৰুণ গগৈৰ আদৰ্শৰে উদ্বেলিত কংগ্ৰেছ।’’ তেওঁ আৰু কয় যে অসমৰ ৰাইজে এইবাৰ হিমন্ত বিশ্ব শৰ্মাৰ নেতৃত্বৰ কংগ্ৰেছ বিচাৰে নে তৰুণ গগৈৰ আদৰ্শৰ কংগ্ৰেছ বিচাৰে সেই সিদ্ধান্ত গ্ৰহণ কৰিব। ”যেতিয়া অসমত কংগ্ৰেছৰ চৰকাৰ আছিল তেতিয়া যিসকল নেতা-মন্ত্ৰীৰ কাম-কাজৰ বাবে তৰুণ গগৈদেৱৰ চৰকাৰৰ ওপৰত এটা দাগ লাগিল আৰু মানুহবোৰে কংগ্ৰেছ চৰকাৰৰ পৰা আঁতৰি গ’ল সেইসকল নেতাই এতিয়া বাজপেয়ী ভৱনত মন্ত্ৰী-বিধায়ক হোৱাৰ বাবে একত্ৰিত হৈছে। আমাৰ লগত আছে তৰুণ গগৈৰ আদৰ্শৰে আগবঢ়া কংগ্ৰেছ। য’ত ৰাইজে নতুনত্ব দেখিবলৈ পাইছে। নতুন চেহেৰা দেখা পাইছে।’’-গগৈয়ে কয়। এইবাৰৰ নিৰ্বাচনত বিজেপি দল নহয়, হিমন্ত বিশ্ব শৰ্মাৰ নেতৃত্বৰ পুৰণি কংগ্ৰেছ আৰু তৰুণ গগৈৰ আদৰ্শৰে অনুপ্ৰাণিত নতুন কংগ্ৰেছৰ মাজতহে যুঁজ হ’ব বুলিও কয় গগৈয়ে। তেওঁ আৰু কয়, ”আমি এইবাৰ নতুন মুখৰ ওপৰত গুৰুত্ব দিছো। উজনি অসমত বিৰোধী দলৰ মাজত যথেষ্ট মিল আছে। যাৰ বাবে মই আশাবাদী এইবাৰ অসমত কংগ্ৰেছৰ নেতৃত্বৰ চৰকাৰ হ’ব। এই চৰকাৰৰ ৰণডংকা উজনি অসম আৰু উত্তৰ অসমত প্ৰথম শুনা পাম। উজনি অসম আৰু উত্তৰ অসমত ফলাফল এইবাৰ ভাল হ’ব।’’ মিত্ৰতাক লৈ দলে যি সিদ্ধান্ত ল’লে তাৰ প্ৰতি সকলো নেতা-কৰ্মীয়ে অসমৰ বৃহত্তৰ স্বাৰ্থত সন্মান প্ৰদৰ্শন কৰি কাম কৰি যাবলৈকো গগৈয়ে সকলোকে আহ্বান জনায়। মিত্ৰজোঁটত থকা প্ৰতিটো দলৰ নেতা-কৰ্মীসকলৰ ত্যাগ আৰু কষ্টৰ বাবেও তেওঁ কৃতজ্ঞতা প্ৰকাশ কৰে। গগৈয়ে কয় যে মিত্ৰতা যথেষ্ট শক্তিশালী হৈছে আৰু সেয়ে এইবাৰ কংগ্ৰেছৰ নেতৃত্বত অসমত নতুন চৰকাৰ গঠন হ’ব। মাজুলী সমষ্টিত এইবাৰৰ নিৰ্বাচনত কংগ্ৰেছ দলৰ বিজয় সুনিশ্চিত বুলিও গগৈয়ে মন্তব্য কৰে। উল্লেখ্য যে, আজি মাজুলীত প্ৰদেশ কংগ্ৰেছৰ সভাপতিগৰাকীয়ে কংগ্ৰেছ দলৰ প্ৰাৰ্থী ইন্দ্ৰনীল পেগুৰ হৈ ৰাইজৰ আশীৰ্বাদ বিচাৰি হাজাৰৰো অধিক বাইকৰ অংশগ্ৰহণেৰে এক বাইক ৰেলীত অংশগ্ৰহণ কৰে।
#Congress #GauravGogoi #CongressParty #political #PoliticalNews
