● তথ্য-প্ৰযুক্তি খণ্ডত এ.আইৰ চমক
● মানুহৰ বিকল্প নহয়, সহায়কহে এ.আই
● অক্সফৰ্ড ইকনমিক্সৰ প্ৰতিবেদন
● অৰ্থনীতিত প্ৰকৃত প্ৰভাৱ পৰিবলৈ লাগিব কেইবাদশক
সমগ্ৰ বিশ্বৰ লগতে ভাৰতৰ তথ্য-প্ৰযুক্তি খণ্ডতো বৰ্তমান কৃত্ৰিম বুদ্ধিমত্তাক লৈ ব্যাপক উছাহ পৰিলক্ষিত হৈছে যদিও ইয়াৰ অৰ্থনৈতিক প্ৰভাৱক লৈ এক বাস্তৱিক মূল্যায়নৰ প্ৰয়োজনীয়তা আহি পৰিছে। অক্সফৰ্ড ইকনমিক্সৰ শেহতীয়া এক প্ৰতিবেদনৰ মতে, কৃত্ৰিম বুদ্ধিমত্তাই তাৎক্ষণিকভাৱে কোনো বৃহৎ অৰ্থনৈতিক বা উৎপাদনশীলতাৰ বিপ্লৱ অনাৰ সম্ভাৱনা অতি ক্ষীণ। প্ৰতিবেদনখনৰ মুখ্য অৰ্থনীতিবিদ আডাম স্লেটাৰৰ মতে, বৰ্তমানলৈকে এই প্ৰযুক্তিয়ে সামগ্ৰিক অৰ্থনীতিত কোনো আমূল পৰিৱৰ্তন অনাৰ নিৰ্দিষ্ট প্ৰমাণ পোৱা হোৱা নাই আৰু অনাগত দিনতো ইয়াৰ প্ৰভাৱ লেহেমীয়া হোৱাৰেই পূৰ্বানুমান কৰা হৈছে। ভাৰতৰ দৰে বিশাল তথ্য-প্ৰযুক্তি খণ্ড থকা দেশ এখনতো এআইৰ ব্যৱহাৰ বৃদ্ধি পালেও, ইয়াৰ পৰা আশা কৰা ধৰণৰ দ্ৰুত পৰিৱৰ্তন বাস্তৱত ৰূপায়ণ হ’বলৈ এতিয়াও বহু বাকী।
ভাৰতীয় তথ্য-প্ৰযুক্তি প্ৰতিষ্ঠানসমূহে ইতিমধ্যে ছফ্টৱেৰ ইঞ্জিনিয়াৰিং আৰু ক’ডিং আদিৰ ক্ষেত্ৰত এআইৰ ব্যৱহাৰ আৰম্ভ কৰিছে আৰু ইয়াৰ ফলত কৰ্মকুশলতা ১৫ ৰ পৰা ৩৫ শতাংশলৈকে বৃদ্ধি পোৱা দেখা গৈছে। টিমলীজ ডিজিটেলৰ মুখ্য কাৰ্যবাহী বিষয়া নীতি শৰ্মাই আঙুলিয়াই দিয়া অনুসৰি, এই প্ৰযুক্তিৰ সহায়ত মূলতঃ পুনৰাবৃত্তিমূলক কামবোৰহে সহজ হৈছে, যাৰ ফলত অভিযন্তাসকলে অধিক জটিল আৰু সিদ্ধান্তমূলক কামত মনোনিৱেশ কৰিব পাৰিছে। অৱশ্যে, এই পৰিৱৰ্তনক তেওঁ যন্ত্ৰচালিত বিপ্লৱৰ সলনি মানৱ-কেন্দ্ৰিক এক বিৱৰ্তন বুলিহে অভিহিত কৰিছে। অৰ্থাৎ, কৃত্ৰিম বুদ্ধিমত্তাই মানুহৰ চাকৰি কাঢ়ি নিয়াৰ পৰিৱৰ্তে মানুহৰ কৰ্মদক্ষতা বৃদ্ধি কৰাতহে সহায় কৰিছে।
কৃত্ৰিম বুদ্ধিমত্তাৰ দ্ৰুত সম্প্ৰসাৰণৰ ক্ষেত্ৰত বিশ্বব্যাপী দেখা দিয়া বাধাৱলীয়ে ভাৰতীয় প্ৰেক্ষাপটতো প্ৰভাৱ পেলাইছে। বিশেষকৈ এআই আন্তঃগাঁথনি গঢ়ি তোলাৰ বাবে প্ৰয়োজন হোৱা বৃহৎ মূলধন, উন্নত মানৰ তথ্যৰ অভাৱ, পুৰণি ব্যৱসায়িক আৰ্হি আৰু শক্তি যোগানৰ সমস্যাই এই প্ৰযুক্তিৰ পূৰ্ণ ব্যৱহাৰত হেঙাৰ হিচাপে থিয় দিছে। তদুপৰি, পৰ্যাপ্ত এআই দক্ষতা সম্পন্ন পেছাদাৰী লোকৰ অভাৱে ভাৰতীয় প্ৰযুক্তি খণ্ডৰ দ্ৰুত উত্তৰণত বাধাৰ সৃষ্টি কৰিছে। এই গাঁথনিগত সীমাবদ্ধতাসমূহৰ বাবেই এআইয়ে বৰ্তমান কেৱল নিৰ্দিষ্ট কামৰ সহায়ক হিচাপেহে কাম কৰি আছে, সম্পূৰ্ণ ব্যৱসায়িক পৰিচালনাৰ দায়িত্ব ল’বলৈ ই এতিয়াও সক্ষম হৈ উঠা নাই।
সামগ্ৰিকভাৱে চাবলৈ গ’লে, ভাৰতত কৃত্ৰিম বুদ্ধিমত্তাৰ ভৱিষ্যত নিশ্চিতভাৱে উজ্জ্বল, কিন্তু ইয়াৰ সুফল পাবলৈ আমি অধিক সময় অপেক্ষা কৰিব লাগিব। অক্সফৰ্ড ইকনমিক্সে পূৰ্বানুমান কৰা অনুসৰি অহা দশকত এআইৰ ফলত মুঠ উৎপাদনশীলতাৰ বৃদ্ধি মাত্ৰ ৩ শতাংশৰ ওচৰা-উচিৰিহে হোৱাৰ সম্ভাৱনা আছে। সেয়েহে, ১৯২০-ৰ দশকৰ বৈদ্যুতিকীকৰণ বা ৯০-ৰ দশকৰ প্ৰযুক্তি বিপ্লৱৰ দৰেই এআইৰ প্ৰকৃত অৰ্থনৈতিক প্ৰভাৱ অনুভৱ কৰিবলৈ মাহৰ সলনি কেইবাদশকৰ প্ৰয়োজন হ’ব পাৰে। এই যাত্ৰা লেহেমীয়া হ’লেও, ই এক সুনিশ্চিত আৰু ধাৰাবাহিক প্ৰগতিৰ দিশে অগ্ৰসৰ হৈছে য’ত হঠাতে অহা পৰিৱৰ্তনতকৈ ক্ৰমান্বয়ে অহা পৰিৱৰ্তনহে অধিক স্থায়ী হ’ব।
নিউজ ডেস্ক ৰিপৰ্ট,নতুন সময়
