● আক্ৰমণাত্মক ক্ৰিকেটৰ নতুন যুগ
● ২০২৪ চনতকৈও অধিক বিপদজনক ২০২৬ৰ টীম ইণ্ডিয়া
● ৰোহিত-বিৰাটৰ অবিহনেও বিশ্বকাপ জয়ৰ সপোন
● টি-২০ বিশ্বকাপত বিশ্বক চমক দিবলৈ সাজু সূৰ্যৰ বাহিনী
ভাৰতীয় ক্ৰিকেট দলে ২০২৬ চনৰ টি-২০ বিশ্বকাপৰ আয়োজক হিচাপে এক নতুন আত্মবিশ্বাস আৰু আক্ৰমণাত্মক মানসিকতা লৈ খেলপথাৰত নামিবলৈ সাজু হৈছে। ১৯ মাহ পূৰ্বে কেৰিবিয়ানত ৰোহিত শৰ্মাৰ নেতৃত্বত ভাৰতে যি বিজয়ৰ ধাৰা আৰম্ভ কৰিছিল, বৰ্তমানৰ সূৰ্যকুমাৰ যাদৱৰ নেতৃত্বাধীন দলটোৱে সেই ধাৰাক এক অনন্য মাত্ৰা প্ৰদান কৰিছে। প্ৰাক্তন উইকেটকীপাৰ তথা ক্ৰিকেট ভাষ্যকাৰ দীপ দাসগুপ্তৰ মতে, বৰ্তমানৰ দলটো ২০২৪ চনৰ বিশ্বকাপ বিজয়ী দলতকৈও কেইবা গুণ আগবঢ়া।
ৰোহিত শৰ্মা আৰু বিৰাট কোহলীৰ অৱসৰৰ পাছত ভাৰতীয় দলটোৱে দ্ৰুতগতিত নিজকে সলনি কৰিবলৈ সক্ষম হৈছে, য’ত ২০২৪ চনৰ বিজয়ী দলৰ আঠজন সদস্য বৰ্তমানৰ দলটোত আছে। বাৰ্বাড’ছৰ ফাইনেলৰ পৰা এতিয়ালৈকে ভাৰতীয় দলত অভিষেক শৰ্মা আৰু বৰুণ চক্ৰৱৰ্তীৰ দৰে খেলুৱৈৰ অন্তৰ্ভুক্তি ঘটিছে, যিসকলে বৰ্তমান আইচিচিৰ ৰেংকিঙত ক্ৰমে বেটিং আৰু বলিংত শীৰ্ষস্থান দখল কৰি আছে। আনহাতে, তিলক বাৰ্মাই যোৱা বছৰ এছিয়া কাপত দেখুওৱা দৰ্শনীয় প্ৰদৰ্শনৰ জৰিয়তে দলত নিজৰ স্থান মজবুত কৰিছে । যশপ্ৰীত বুমৰাহ আৰু অৰ্শদীপ সিঙৰ নেতৃত্বত পেচ বলিং আক্ৰমণ শক্তিশালী হোৱাৰ লগতে হৰ্ষিত ৰাণাইও অলৰাউণ্ডাৰ হিচাপে দললৈ বৰঙণি আগবঢ়াইছে।
পৰিসংখ্যাৰ ফালৰ পৰা চাবলৈ গলে, ২০২৩ চনৰ অক্টোবৰৰ পৰা ভাৰতে সৰ্বাধিক ২০ বাৰ ২০০ ৰ অধিক স্ক’ৰ সংগ্ৰহ কৰি এক নতুন অভিলেখ গঢ়িছে। দলটোৰ ছিক্স মৰাৰ হাৰো বিশ্বৰ যিকোনো দলতকৈ বেছি, য’ত প্ৰতি ১০.৯৯ বলত এটা ছিক্স মাৰা হয়। এই বিধ্বংসী বেটিং শৈলীৰ মূলতে আছে অভিষেক শৰ্মা, যাৰ ১৯৪.৭৪ ষ্ট্ৰাইক ৰেটে ভাৰতৰ পাৱাৰ প্লে’ বেটিঙৰ সংজ্ঞাই সলনি কৰি পেলাইছে। ইফালে, ঈশান কিষাণে সংৰক্ষিত উইকেটকীপাৰ হিচাপে নিৰ্বাচিত হ’লেও, নিউজিলেণ্ডৰ বিৰুদ্ধে তেওঁৰ শেহতীয়া অনবদ্য প্ৰদৰ্শনে আমেৰিকা যুক্তৰাষ্ট্ৰৰ বিৰুদ্ধে হ’বলগীয়া প্ৰথম মেচত তেওঁৰ স্থান প্ৰায় নিশ্চিত কৰিছে।
অৱশ্যে, বিশ্বকাপৰ দৰে দীঘলীয়া প্ৰতিযোগিতাত কেৱল পাৱাৰ হিটিঙেই যথেষ্ট নহ’বও পাৰে বুলি সতৰ্ক কৰি দিছে বিশেষজ্ঞসকলে। দীপ দাসগুপ্তৰ মতে, টুৰ্ণামেণ্টৰ পৰৱৰ্তী পৰ্যায়ত পিটচসমূহ ধীৰ গতিৰ হ’লে বিৰাট কোহলীৰ দৰে ইনিংছ ধৰি ৰখা খেলুৱৈৰ অভাৱ অনুভৱ হ’ব পাৰে। তেওঁ উল্লেখ কৰে যে তিলক বাৰ্মা আৰু অধিনায়ক সূৰ্যকুমাৰ যাদৱৰ ওপৰত পৰিস্থিতি সাপেক্ষে নিজৰ খেল সলনি কৰাৰ গুৰুত্বপূৰ্ণ দায়িত্ব থাকিব। বাওঁহতীয়া বেটাৰৰ আধিপত্য থকা টপ অৰ্ডাৰত সঠিক ভাৰসাম্য ৰক্ষা কৰা আৰু কঠিন পিটচত পাৱাৰ হিটাৰসকলক নিয়ন্ত্ৰণ কৰাটোৱেই এতিয়া ভাৰতৰ বাবে মূল পৰীক্ষা হ’ব।
