● বিশ্ব ক্ৰিকেটত ভাৰতৰ আধিপত্য অক্ষুণ্ণ
● ষষ্ঠবাৰৰ বাবে ‘মেন ইন ব্লু’ৰ শিৰত ১৯ বছৰ অনূৰ্ধৰ বিশ্বকাপৰ মুকুট
● ৪১১ ৰানৰ বিশ্বৰেকৰ্ডেৰে ইংলেণ্ডক ধৰাশায়ী কৰি বিশ্ব চেম্পিয়ন ভাৰত
বিশ্ব ক্ৰিকেটত ভাৰতীয় যুৱ শক্তিৰ আধিপত্য পুনৰবাৰ প্ৰতিষ্ঠা কৰি শুকুৰবাৰে জিম্বাবোৱেৰ হাৰাৰে স্প’ৰ্টছ ক্লাবত ভাৰতে ইতিহাস ৰচনা কৰিলে। ২০২৬ চনৰ ১৯ বছৰ অনূৰ্ধৰ বিশ্বকাপৰ ফাইনেলত ইংলেণ্ডক ১০০ ৰানৰ বিশাল ব্যৱধানত পৰাস্ত কৰি ভাৰতে অভিলেখ সৃষ্টিকাৰী ষষ্ঠটো খিতাপ নিজৰ নামত কৰে। টছত জয়ী হৈ প্ৰথমে বেটিং কৰা ভাৰতীয় দলটোৱে নিৰ্ধাৰিত ৫০ অভাৰত ৯ উইকেট হেৰুৱাই ৪১১ ৰানৰ এক পাহাৰসম স্ক’ৰ তৈয়াৰ কৰে। উল্লেখযোগ্য যে বিশ্বকাপৰ ফাইনেলৰ ইতিহাসত পূৰ্বতে কোনো দলেই ইমান বিশাল স্ক’ৰ গঢ়িবলৈ সক্ষম হোৱা নাছিল। সমগ্ৰ টুৰ্ণামেণ্টত অপৰাজিত হৈ থকা ‘মেন ইন ব্লু’ৰ এই দৰ্শনীয় জয়ে বিগত দুটা বছৰত আইচিচিৰ বিভিন্ন পৰ্যায়ত ভাৰতৰ ধাৰাবাহিক সফলতাক এক নতুন মাত্ৰা প্ৰদান কৰিলে।
মেচখনৰ মূল আকৰ্ষণ আৰু ভাৰতৰ বিজয়ৰ প্ৰধান কাণ্ডাৰী আছিল মাত্ৰ ১৪ বছৰীয়া বিস্ময়কৰ প্ৰতিভা বৈভৱ সূৰ্যবংশী। বিহাৰৰ সমস্তিপুৰৰ পৰা অহা এইগৰাকী বাঁওহতীয়া বেটাৰে ইংলেণ্ডৰ বলাৰসকলক নিৰ্দয়ভাৱে প্ৰহাৰ কৰি মাত্ৰ ৮০ টা বলত ১৭৫ ৰানৰ এক বিস্ফোৰক ইনিংছ খেলে। তেওঁৰ এই মাৰাথন ইনিংছটোত অন্তৰ্ভুক্ত আছিল ১৫ টা চাৰি আৰু ১৫ টা বিশাল ছিক্স, যিয়ে ১৯ বছৰ অনূৰ্ধৰ বিশ্বকাপৰ ফাইনেলত ব্যক্তিগত সৰ্বাধিক স্ক’ৰৰ নতুন বিশ্বৰেকৰ্ড গঢ়ে। অধিনায়ক আয়ুষ মহাত্ৰেৰ ৫৩ ৰান আৰু শেষলৈ অভিজ্ঞান কুণ্ডুৰ ৪০ ৰাণ তথা কনিষ্ক চৌহানৰ ৩৭ ৰাণৰ বেটিঙে ভাৰতক এক সুউচ্চ স্তৰলৈ লৈ যায়, যিটো লক্ষ্য অতিক্ৰম কৰা ইংলেণ্ডৰ দৰে শক্তিশালী দলৰ বাবেও প্ৰায় অসম্ভৱ হৈ পৰিছিল।
৪১২ ৰানৰ হিমালয় সদৃশ লক্ষ্য আগত লৈ বেটিং কৰিবলৈ নামি ইংলেণ্ডে আৰম্ভণিতে তীব্ৰ চাপৰ সন্মুখীন হয় যদিও দলটোৰ বেটছমেন কেলেব ফালকোনাৰে দৰ্শকৰ মন জয় কৰে। ফালকোনাৰে ৬৭ বলত ১১৫ ৰানৰ এক দৰ্শনীয় শতকীয় ইনিংছ খেলি ভাৰতীয় শিবিৰত কিছু সময়ৰ বাবে চিন্তাৰ উদ্রেক ঘটাইছিল। বেন ডকিন্সে ৬৬ আৰু বেন মেয়েজে ৪৫ ৰানৰ বৰঙণি আগবঢ়ায় যদিও ক্ৰমান্বয়ে বাঢ়ি অহা ‘আস্কিং ৰান-ৰেট’ৰ চাপত ইংলেণ্ডৰ বেটিং লাইনআপ খহি পৰে। ভাৰতৰ হৈ পেচ বলাৰ আৰ এছ আমব্ৰিশে ৩ টা গুৰুত্বপূৰ্ণ উইকেট দখল কৰাৰ লগতে দিপেশ দেৱেন্দ্ৰন আৰু কনিষ্ক চৌহানে ২ টাকৈ উইকেট লৈ ৪০.২ অভাৰত ৩১১ ৰানতে ইংলেণ্ডক বাউণ্ডাৰীৰ বাহিৰ কৰে।
এই ঐতিহাসিক জয়ে ভাৰতীয় ক্ৰিকেটৰ ভৱিষ্যত যে সুৰক্ষিত, সেই কথা পুনৰ এবাৰ বিশ্বৰ দৰবাৰত প্ৰমাণ কৰিলে। বিশেষকৈ ছেমিফাইনেলত আফগানিস্তানৰ দৰে কঠিন প্ৰতিদ্বন্দ্বীক পৰাস্ত কৰি ফাইনেলত দেখুওৱা এই দলীয় সংহতি আৰু পেছাদাৰী মনোবৃত্তিয়ে ক্ৰিকেট বিশেষজ্ঞসকলৰ দৃষ্টি আকৰ্ষণ কৰিছে। বিচিচিআইয়ে দলটোৰ এই অভূতপূৰ্ব সাফল্যক ভূয়সী প্ৰশংসা কৰি উল্লেখ কৰে যে এই বিজয় ভাৰতৰ তৃণমূল পৰ্যায়ৰ আন্তঃগাঁথনি আৰু প্ৰতিভা অন্বেষণ কাৰ্যসূচীৰ এক ডাঙৰ সফলতা।
নিউজ ডেস্ক ৰিপৰ্ট,নতুন সময়
