● জৈৱ-বৈচিত্ৰলৈ অশনি সংকেত
● জাৰ্নেল অৱ আৰ্থ চিষ্টেম চাইন্সত প্ৰকাশ ভয়ংকৰ তথ্য
● পূব হিমালয়ৰ গলনাংকত অৰুণাচলে হেৰুৱালে ১১০টা হিমবাহ
● প্ৰতি দশকত ০.১° চেলছিয়াচৰ পৰা ০.৮° চেলচিয়াছ পৰ্যন্ত উষ্ণতা বৃদ্ধিৰ তথ্য
নাগালেণ্ড বিশ্ববিদ্যালয়ৰ পৰিৱেশ বিজ্ঞান বিভাগৰ বিমহা ৰিটছে, আমেনু চুছান কুলনু, লাটংলিলা জামিৰ আৰু কটন বিশ্ববিদ্যালয়ৰ পৰিৱেশ জীৱবিজ্ঞান আৰু বন্যপ্ৰাণী বিজ্ঞান বিভাগৰ নৱজিৎ হাজৰিকাই যুগুত কৰা এক গৱেষণা তথা জাৰ্নেল অৱ আৰ্থ চিষ্টেম চাইন্সত প্ৰকাশিত এক তথ্য অনুসৰি পূব হিমালয়ৰ পৰিৱেশ তন্ত্ৰৰ এক গুৰুত্বপূৰ্ণ অংশ অৰুণাচল প্ৰদেশে বিগত ৩২ বছৰত ১১০টা হিমবাহ হেৰুৱাইছে।
১৯৮৮ চনৰ পৰা ২০২০ চনৰ ভিতৰত হিমবাহৰ পৰিৱৰ্তনৰ মূল্যায়নৰ বাবে উপগ্ৰহৰ চিত্ৰ আৰু ভূ-প্ৰকৃতিৰ মানচিত্ৰ বিশ্লেষণ কৰি অধ্যয়ন কৰা এই গৱেষণাৰ অন্তত দেখা গৈছে যে অৰুণাচল প্ৰদেশৰ মুঠ হিমবাহৰ সংখ্যা ১৯৮৮ চনৰ ৭৫৬ টাৰ পৰা ২০২০ চনত ৬৪৬ টা লৈ হ্ৰাস পোৱাৰ বিপৰীতে সামগ্ৰিক হিমবাহৰ এলেকা ৫৮৫.২৩ বৰ্গ কিলোমিটাৰৰ পৰা ৩০৯.৮৫ বৰ্গ কিলোমিটাৰলৈ হ্ৰাস পাইছে।
প্ৰায় ২৭৫ বৰ্গ কিলোমিটাৰ হিমবাহৰ এলেকা ক্ষতিগ্ৰস্ত হোৱাৰ অন্যতম কাৰণ হ’ল বিশ্ব জলবায়ু পৰিৱৰ্তন, উষ্ণতা বৃদ্ধি আৰু বৰষুণৰ ধৰণৰ পৰিৱৰ্তন। বিজ্ঞানীসকলে লক্ষ্য কৰিছে যে কম উচ্চতাত অৱস্থিত হিমবাহসমূহে অধিক উচ্চতাৰ তুলনাত অধিক দ্ৰুত পিছুৱাই যোৱাৰ প্ৰৱণতা প্ৰদৰ্শন কৰে, যিয়ে পূব হিমালয়ৰ দুৰ্বলতাৰ প্ৰতি উদ্বেগক আৰু অধিক শক্তিশালী কৰি তুলিছে।
বিভিন্ন সময়ত হিমালয়ৰ ওপৰত কৰা কেইবাটাও বতৰ বিজ্ঞানৰ অধ্যয়নত উষ্ণতা আৰু জলবায়ু পৰিৱৰ্তন সম্পৰ্কে কিছুমান ভয়ংকৰ তথ্য প্ৰকাশ পাইছে। পূব হিমালয়ৰ অভিন্ন অংশ অৰুণাচল প্ৰদেশত এতিয়া বিশ্বৰ গড় হাৰ অতিক্ৰম কৰি প্ৰতি দশকত ০.১° চেলছিয়াচৰ পৰা ০.৮° চেলচিয়াছ পৰ্যন্ত উষ্ণতা বৃদ্ধি হোৱাৰ তথ্য সমুখলৈ আহিছে।
অধ্যয়নটোৰ মুখ্য পৰিৱেশ বিজ্ঞানীসকলে সকীয়াই দিছে যে হিমবাহৰ দ্ৰুত গলনাংকই জলসম্পদৰ প্ৰতি ভৱিষ্যতৰ দিনত যথেষ্ট ভাবুকি কঢ়িয়াই আনিব আৰু ইয়াৰ ফলত অধিক বানপানীৰ সৃষ্টি হ’ব পাৰে।
অধ্যয়নৰ প্ৰতিবেদন নিৰীক্ষণ কৰি পৰিৱেশ বিশেষজ্ঞসকলে হিমবাহৰ বিস্তৃত নিৰীক্ষণ, জলবায়ুৰ বহনক্ষম নীতি তথা বহনক্ষম জল ব্যৱস্থাপনাৰ কৌশলকে ধৰি তাৎক্ষণিক ব্যৱস্থা গ্ৰহণৰ বাবে আহ্বান জনাইছে। পূব হিমালয়ে গোলকীয় উষ্ণতা বৃদ্ধিৰ বোজা বহন কৰি থকাৰ সময়তে এই অধ্যয়নে অধিক ক্ষতি হ্ৰাস কৰিবলৈ জলবায়ুৰ ক্ষেত্ৰত নিৰ্ণায়ক ব্যৱস্থা গ্ৰহণৰ জৰুৰী প্ৰয়োজনীয়তাৰ কথা সোঁৱৰাই দিছে।
