গুৱাহাটীঃ শুকুৰবাৰে মন্ত্ৰী জয়ন্ত মল্ল বৰুৱাই সংবাদমেলত এজন সাংবাদিকে প্ৰশ্ন সোধাৰ বাবে যিধৰণেৰে তুচ্ছ-তাচ্ছিল্য কৰি “আপুনি তলৰ শ্ৰেণীৰ মানুহ”, আপোনাক মই উত্তৰ নিদিওঁ, মালিককহে উত্তৰ দিম বুলি কৈ চৰম স্পৰ্ধা দেখুৱাই অপমান কৰিলে অসম প্ৰদেশ কংগ্ৰেছে তীব্ৰ ভাষাৰে নিন্দা কৰাৰ লগতে গৰিহণা দিছে। অসম প্ৰদেশ কংগ্ৰেছে এক বিবৃতিত উল্লেখ কৰি কয়, এজন দায়িত্বশীল আৰু কণমানো শিষ্টাচাৰ থকা মন্ত্ৰীয়ে কেতিয়াও এজন সাংবাদিকক উদ্দেশ্যি এনে মন্তব্য কৰিব নোৱাৰে৷ এনে নীচ আৰু নিন্দনীয় মন্তব্যৰ দ্বাৰা মন্ত্ৰী গৰাকীয়ে নিজৰ মানসিতকা প্ৰকাশ কৰিলে। আচলতে এইয়া বিজেপি দল আৰু ইয়াৰ নেতাসকলৰ পুৰণি পৰম্পৰা।
সকলো নাগৰিক আৰু সমাজৰ সকলো শ্ৰেণীৰ মানুহকে আমাৰ দেশৰ সংবিধানে সমান অধিকাৰ আৰু ক্ষমতা প্ৰদান কৰিছে। গতিকে ইয়াক সুৰক্ষা প্ৰদান কৰাতো সংবিধানক সন্মান কৰা আৰু গণতন্ত্ৰ প্ৰেমী প্ৰতিজন ব্যক্তিৰে দায়িত্ব আৰু কৰ্তব্য বুলি প্ৰদেশ কংগ্ৰেছে প্ৰকাশ কৰিছে। বিশেষকৈ সংবিধানৰ নামত শপত খাই সাংবিধানিক পদত অধিষ্ঠিত হোৱা সকলৰ এই ক্ষেত্ৰত দায়িত্ব বেছি যদিও বিজেপি চৰকাৰৰ দিনত অসমত সম্প্ৰতি প্ৰশ্ন সোধাৰ বাবে সাংবাদিকক তুচ্ছ-তাচ্ছিল্য, অপমান কৰাৰ লগতে জেললৈও প্ৰেৰণ কৰাৰ ঘটনাহে সংঘটিত হৈছে বুলিও বিবৃতিটোত প্ৰদেশ কংগ্ৰেছে উল্লেখ কৰিছে।
অসম প্ৰদেশ কংগ্ৰেছে দাবী উত্থাপন কৰি কয় যে ক্ষমতাৰ ৰাগীত মতলীয়া হৈ স্পৰ্ধাৰ সকলো সীমা অতিক্ৰম কৰা মন্ত্ৰী জয়ন্ত মল্ল বৰুৱাই সাংবাদিকক কৰা চুড়ান্ত অপমানৰ বাবে অসমবাসীৰ ওচৰত ৰাজহুৱাকৈ ক্ষমা খোজক আৰু সাংবাদিক গৰাকীৰ ওচৰলৈ গৈও ক্ষমা বিচাৰক।
