● আকৰ্ষণৰ কেন্দ্ৰবিন্দুত পৰিণত বিৰোধীৰ তিনি মহিলা প্ৰাৰ্থী
● লণ্ডন-ফেৰৎ কুংকি চৌধুৰী পৰা ড° জ্ঞানশ্ৰী বৰালৈ
● অসমৰ ৰাজনীতিত সুস্থ পৰিৱৰ্তনৰ সূচনাৰে নিৰ্বাচনী ৰণত উচ্চ শিক্ষিতা যুৱতী
● নৱজাগৰণৰ অন্যতম শক্তি হিচাপে থিয় দিছে দিশপুৰ সমষ্টিৰ কংগ্ৰেছ প্ৰাৰ্থী মীৰা বৰঠাকুৰ
অহা ৯ এপ্ৰিল তাৰিখে অনুষ্ঠিত হ’বলগীয়া অসম বিধানসভা নিৰ্বাচনৰ বাবে ২৩ মাৰ্চত মনোনয়ন পত্ৰ দাখিলৰ প্ৰক্ৰিয়া সমাপ্ত হোৱাৰ লগে লগে ৰাজ্যৰ ৰাজনৈতিক প্ৰেক্ষাপটত এক তাৎপৰ্যপূৰ্ণ পৰিৱৰ্তন পৰিলক্ষিত হৈছে। ‘এছ’চিয়েশ্যন ফৰ ডেম’ক্ৰেটিক ৰিফৰ্মছ’ৰ শেহতীয়া তথ্য অনুসৰি, ১২৬ জনীয়া অসম বিধানসভাত যোৱা পাঁচ বছৰত মহিলা প্ৰতিনিধিৰ হাৰ মাত্ৰ ৬ শতাংশ আছিল, যিটো ৰাষ্ট্ৰীয় গড়তকৈ যথেষ্ট নিৰাশাজনক। এনে এক পুৰুষতান্ত্ৰিক ৰাজনৈতিক পৰিৱেশ আৰু নিৰুৎসাহজনক পৰিসংখ্যাৰ বিপৰীতে এইবাৰ নিৰ্বাচনত বিৰোধী শিবিৰৰ পৰা প্ৰক্ষেপিত তিনিগৰাকী প্ৰাৰ্থীয়ে সমগ্ৰ ৰাজ্যখনৰ সচেতন মহলৰ দৃষ্টি বিশেষভাৱে আকৰ্ষণ কৰিবলৈ সক্ষম হৈছে।
এই নৱজাগৰণৰ অন্যতম শক্তি হিচাপে থিয় দিছে দিশপুৰ সমষ্টিৰ কংগ্ৰেছ প্ৰাৰ্থী মীৰা বৰঠাকুৰ। অসমৰ ৰাজনীতিত এক পৰিচিত নাম মীৰা বৰঠাকুৰে দীৰ্ঘদিন ধৰি জনসাধাৰণৰ অধিকাৰৰ হকে সক্ৰিয় হৈ কাম কৰি আহিছে। কোনো ধৰণৰ অপৰাধমূলক গোচৰ নথকা এইগৰাকী নেত্ৰীয়ে নিৰন্তৰভাৱে শাসকীয় পক্ষৰ দুৰ্নীতি আৰু নীতিগত বিসংগতিসমূহক তথ্যসমৃদ্ধ আৰু নিৰ্ভীক যুক্তিৰে সমালোচনা কৰি আহিছে। দিশপুৰৰ দৰে গুৰুত্বপূৰ্ণ সমষ্টিত তেওঁৰ প্ৰতিদ্বন্দ্বিতাই বিৰোধীৰ স্থিতিক অধিক সুদৃঢ় কৰাৰ লগতে ৰাইজৰ মাজত এক শক্তিশালী বিকল্পৰ আশা সঞ্চাৰ কৰিছে।
আনহাতে, মৰিয়নি সমষ্টিত ৰাইজৰ দলৰ হৈ প্ৰতিদ্বন্দ্বিতা আগবঢ়োৱা ৩৪ বছৰীয়া ড° জ্ঞানশ্ৰী বৰাই ত্যাগ আৰু সাহসৰ এক বিৰল নিদৰ্শন দাঙি ধৰিছে। ৰসায়ন বিজ্ঞানত ডক্টৰেট ডিগ্ৰীধাৰী ড° বৰাই গোৱালপাৰা মহাবিদ্যালয়ৰ সহকাৰী অধ্যাপকৰ দৰে সন্মানীয় আৰু সুৰক্ষিত চৰকাৰী চাকৰি ত্যাগ কৰি প্ৰত্যক্ষ ৰাজনীতিত খোজ দিছে। ২০১৯-২০ বৰ্ষৰ ‘কা’ বিৰোধী আন্দোলনৰ অগ্ৰণী নেত্ৰীগৰাকীয়ে চৰকাৰৰ অদূৰদৰ্শী নীতি, নিবনুৱা সমস্যা আৰু স্বাস্থ্যখণ্ডৰ দুৰৱস্থাক লৈ শাসকীয় পক্ষক ক্ষুৰধাৰ সমালোচনা কৰাৰ লগতে মৰিয়নিত বিজেপিৰ প্ৰক্ষেপিত প্ৰাৰ্থীৰ বিৰুদ্ধে এক প্ৰত্যাহ্বানমূলক যুঁজৰ সূচনা কৰিছে।
এই নিৰ্বাচনী যুঁজত আটাইতকৈ চৰ্চিত নৱাগত মুখখন হৈছে চেণ্ট্ৰেল গুৱাহাটী সমষ্টিৰ অসম জাতীয় পৰিষদৰ মাত্ৰ ২৬ বছৰীয়া প্ৰাৰ্থী কুংকি চৌধুৰী। লণ্ডনৰ ‘ইউনিভাৰ্ছিটী কলেজ লণ্ডন’ৰ পৰা শেহতীয়াকৈ এডুকেচনেল লিডাৰশ্বিপ বিষয়ত স্নাতকোত্তৰ ডিগ্ৰী গ্ৰহণ কৰি উভতি অহা কুংকিয়ে মনোনয়ন দাখিলৰ সময়ত যান-জঁট পৰিহাৰ কৰিবলৈ কোনো বিশাল সমদল বাহিৰ নকৰাৰ যি দায়িত্বশীল সিদ্ধান্ত ল’লে, সেয়া এক সুস্থ ৰাজনৈতিক আদৰ্শৰ প্ৰতীক। দক্ষতা বিকাশ আৰু মহিলা সৱলীকৰণৰ লক্ষ্যৰে নিৰ্বাচনত অৱতীৰ্ণ হোৱা কুংকি আৰু ড° জ্ঞানশ্ৰীৰ দৰে উচ্চ শিক্ষিতা যুৱতীৰ ৰাজনীতিত অংশগ্ৰহণে অসমৰ সমাজ জীৱনত এক ইতিবাচক পৰিৱেশৰ সৃষ্টি কৰিছে, যিয়ে কেৱল বিৰোধীক শক্তিশালী কৰাই নহয়, বৰঞ্চ মেধা আৰু যুক্তিৰে ৰাজনীতিত মহিলা সৱলীকৰণৰ এক নতুন অধ্যায়ৰ সূচনা কৰিছে।
নিউজ ডেস্ক ৰিপৰ্ট, নতুন সময়
