নিউজ ডেস্কঃ
চাহ উদ্যোগ হৈছে অসমৰ অৰ্থনীতি আৰু অসমৰ জনজীৱনৰ সৈতে সম্পৃক্ত হৈ থকা এক গুৰুত্বপূৰ্ণ উদ্যোগখণ্ড।পিছে এই বৃহৎ ঔদ্যোগিক ক্ষেত্ৰখনলৈ শেহতীয়াকৈ ভাবুকি হৈ দেখা দিছে অস্বাভাৱিক জলবায়ু পৰিৱৰ্তনে।ভাৰতবৰ্ষৰ ৫০% তকৈ অধিক চাহ অসমত উৎপাদিত হয়। পৃথিৱীৰ দ্বিতীয় বৃহৎ চাহ উৎপাদনকাৰী দেশ হিচাপে পৰিগণিত হোৱা ভাৰতৰ চাহ উদ্যোগত সাম্প্ৰতিক সময়ত বিভিন্ন সমস্যা উদ্ভৱ হোৱা দেখা যায়। ইয়াৰে এক অন্যতম সমস্যা হৈছে জলবায়ু পৰিৱৰ্তনৰ নেতিবাচক প্ৰভাৱ।
অসমত বছৰি ৭০ কোটি কিলোগ্ৰামতকৈ অধিক চাহ উৎপাদন হয়, যাৰ বাবে ই সমগ্ৰ বিশ্বৰ ভিতৰতে অন্যতম বৃহৎ চাহ উৎপাদনকাৰী অঞ্চল হিচাপে পৰিগণিত হৈছে। অৱশ্যে , সাম্প্ৰতিক সময়ত এই শক্তি কেন্দ্ৰটো ভয়াৱহ বিপদৰ সন্মুখীন হৈছে। বিগত দশকত জলবায়ু পৰিৱৰ্তনে অসমৰ চাহ বাগিচাসমূহে নিৰ্ভৰ কৰা উষ্ণতা, বৰষুণ, আৰ্দ্ৰতাৰ সুক্ষ্ম ভাৰসাম্যৰ যথেষ্ট পৰিৱৰ্তন ঘটাইছে। অঞ্চলটোত গড় উষ্ণতা ক্ৰমান্বয়ে অধিক হৈ পৰাৰ লগতে অস্বাভাৱিক বতৰৰ পৰিৱৰ্তনে চাহ উৎপাদনৰ ক্ষেত্ৰত গুৰুতৰ ভাবুকিৰ সৃষ্টি কৰিছে।ভাৰতীয় চাহ গৱেষণা সংস্থাই ২০২৩ চনত প্ৰকাশ কৰা এক প্ৰতিবেদন অনুসৰি বিগত পাঁচ বছৰত অসমত চাহৰ উৎপাদন ১১% হ্ৰাস পাইছে। এই হ্ৰাসৰ মূল কাৰণ হৈছে জলবায়ুৰ আৰ্হিৰ পৰিৱৰ্তন।
● উষ্ণতা বৃদ্ধি আৰু চাহৰ গুণাগুণ হ্ৰাস
অসমত জলবায়ু পৰিৱৰ্তনৰ আটাইতকৈ লক্ষণীয় প্ৰভাৱ হৈছে উষ্ণতা বৃদ্ধি। বিগত শতিকাত অসমৰ গড় উষ্ণতা প্ৰায় ১.২ ডিগ্ৰী চেলছিয়াছ বৃদ্ধি পাইছে, বিগত ২০ বছৰত অধিক দ্ৰুত গতিত উষ্ণতা বৃদ্ধি পাইছে। অধিক উষ্ণতাৰ বাবে চাহ গছবোৰ পাত দ্ৰুতগতিত বৃদ্ধি পায় যদিও, ইয়াৰ ফলত চাহৰ গুণাগুণ হ্ৰাস পায়।
ইণ্ডিয়ান টি এছ’চিয়েশ্যনৰ এক অধ্যয়ন অনুসৰি উষ্ণ মাহত উৎপাদিত চাহ পাতৰ ত্বৰান্বিত বৃদ্ধিৰ বাবে আন সময়ত উৎপাদিত চাহতকৈ ৩০% কম সোৱাদ থাকে। ইয়াৰ ফলত ই গুণগত মানৰ চাহ উৎপাদনৰ ক্ষেত্ৰত থকা অসমৰ সুনামক প্ৰভাৱিত কৰে, যাৰ ফলশ্ৰুতিত স্থানীয় উৎপাদকসকলে বিশ্বজুৰি প্ৰতিযোগিতাত অৱতীৰ্ণ হোৱাটো অধিক কঠিন হৈ পৰে।
● অস্বাভাৱিক বৰষুণ আৰু ইয়াৰ পৰিণতি
চাহ বাগিচাসমূহ বিশেষকৈ বাৰিষাৰ সময়ত হোৱা ধাৰাবাহিক বৰষুণৰ ওপৰত বহু পৰিমাণে নিৰ্ভৰ কৰে। কিন্তু জলবায়ু পৰিৱৰ্তনৰ লগে লগে অসমত বৰষুণৰ আৰ্হি ক্ৰমাৎ অস্বাভাৱিক হৈ পৰিছে। এই অঞ্চলত কেতিয়াবা অধিক খৰাং পৰিস্থিতি আৰু কেতিয়াবা মূষলধাৰ বৰষুণ হোৱাৰ ফলত চাহ বাগিচাত পানী জমা হোৱা আৰু মাটি খহনীয়া হোৱাৰ দৰে পৰিস্থিতি উদ্ভৱ হয়।
নতুন দিল্লীস্থিত ভাৰতৰ বতৰ বিজ্ঞান বিভাগৰ এক তথ্য অনুসৰি ২০২৩ চনৰ বাৰিষাত অসমত গড় বৰষুণৰ পৰিমাণতকৈ ১৫% কম বৰষুণ হোৱাৰ বিপৰীতে কিছু কিছু অঞ্চলত প্ৰচণ্ড বৰষুণৰ বাবে ক্ষন্তেকীয়া বান সদৃশ পৰিস্থিতিৰ উদ্ভৱ হৈছিল। এনে ধৰণ অস্থিৰ পৰিৱৰ্তনে চাহ গছৰ যথেষ্ট ক্ষতি সাধন কৰে, দেখা যায় যে এনেধৰণৰ অস্বাভাৱিক পৰিস্থিতিৰ বাবে কিছুমান বাগিচাৰ উৎপাদনশীলতা ২০% পৰ্যন্ত হ্ৰাস পাইছ।
● কীট-পতংগ আৰু ৰোগৰ বিস্তাৰ
ক্ৰমবৰ্ধমান উষ্ণতা আৰু অনিয়মিত বৰষুণৰ ফলতো চাহ গছত বিভিন্ন ধৰণৰ অনিষ্টকাৰী পোক-পতংগ আৰু ৰোগৰ উত্থান ঘটিছে। চাহ গৱেষণা সংস্থাৰ খবৰ অনুসৰি যোৱা পাঁচ বছৰত চাহ গছত ‘মহৰ আক্ৰমণ ৪০% বৃদ্ধি পাইছে। এই কীটবিধে উষ্ণ, আৰ্দ্ৰ পৰিস্থিতিত সহজে বংশ বিস্তাৰ কৰে আৰু ইয়াৰ এই অপকাৰী কীটৰ ক্ষতিৰ ফলত বছৰি চাহৰ উৎপাদন ৭-১০% পর্যন্ত হ্ৰাস পাব পাৰে।এনে ধৰণৰ অনিষ্টকাৰী কীট-পতংগ নিয়ন্ত্ৰণৰ বাবে কীটনাশকৰ ব্যৱহাৰ বৃদ্ধিয়ে অসমৰ চাহৰ স্থায়িত্ব আৰু সামগ্ৰিক গুণগত মানদণ্ডতো প্ৰভাৱ পেলায়। ইয়াৰ উপৰিও কীটনাশক অধিক ব্যৱহাৰে উৎপাদন ব্যয় বৃদ্ধি কৰে।
● অৰ্থনৈতিক প্ৰভাৱ আৰু শ্ৰমিকৰ জীৱিকা
অসমৰ চাহ উদ্যোগত পোনপটীয়াকৈ ১২ লাখৰো অধিক লোকে কৰ্মসংস্থাপনত নিযুক্ত হৈ আছে। ইয়াৰ বহুতেই আৰ্থিকভাৱে দুৰ্বল শ্ৰেণীৰ অন্তৰ্গত। চাহৰ উৎপাদন হ্ৰাস পোৱা আৰু কীটনাশক ব্যৱহাৰৰ ব্যয় বৃদ্ধিৰ লগে লগে শ্ৰমিকৰ ওপৰত অৰ্থনৈতিকভাৱে প্ৰভাৱ পৰা পৰিলক্ষিত হয়। ২০২২ চনত অক্সফাম ইণ্ডিয়াৰ এক অধ্যয়নত প্ৰকাশ পাইছে যে অসমৰ চাহ শ্ৰমিকসকলে প্ৰতিদিনে ১৩৭-১৬৭ টকাহে উপাৰ্জন কৰে। প্ৰতিদিনে ১৬৭ টকা, কৃষি শ্ৰমিকৰ বাবে ৰাষ্ট্ৰীয় গড়তকৈ বহু কম। উৎপাদন হ্ৰাস পোৱাৰ অৰ্থ হ’ল এই শ্ৰমিকসকলৰ বাবে কাম কম আৰু আয় কম, যিয়ে বৰ্তমানৰ প্ৰত্যাহ্বানসমূহ আৰু অধিক ভয়াৱহ কৰি তোলে। তদুপৰি অসমৰ চাহ ৰপ্তানিৰ ক্ষেত্ৰতো সমস্যাৰ উদ্ভৱ হৈছে ৷ বিশ্বব্যাপী ক্ৰেতাসকলে উচ্চমানৰ চাহৰ বাবে অন্য বিকল্পৰ সন্ধান কৰাৰ ফলত ২০২৩ চনত অসমৰ চাহ ৰপ্তানিৰ আয় ৮% হ্ৰাস পায়।
● বিশ্ব জলবায়ু পৰিৱৰ্তন আৰু অসমৰ স্থিতি
মন কৰিবলগীয়া যে অসম অকলেই এই সংকটৰ সন্মুখীন হোৱা নাই৷ কেনিয়াৰ পৰা চীনলৈকে সমগ্ৰ বিশ্বৰ চাহ উৎপাদনকাৰী অঞ্চলসমূহত জলবায়ু পৰিৱৰ্তনে ব্যাপক প্ৰভাৱ পেলাইছে। আন্তঃৰাষ্ট্ৰীয় চাহ সমিতিৰ ২০২৩ চনৰ প্ৰতিবেদনত ইংগিত দিয়া হৈছিল যে বৰ্তমানৰ দৰে জলবায়ুৰ ধাৰা অব্যাহত থাকিলে ২০৫০ চনৰ ভিতৰত বিশ্বৰ চাহ উৎপাদন ২৫% পৰ্যন্ত হ্ৰাস পাব পাৰে। তদুপৰি, বৃদ্ধি পোৱা সমুদ্ৰপৃষ্ঠ আৰু পৰিৱৰ্তিত বিশ্বৰ বতৰৰ ধৰণে অসমৰ জলবায়ুৰ প্ৰত্যাহ্বানক আৰু অধিক তীব্ৰতৰ কৰি তুলিব, যাৰ ফলত সুস্থ অভিযোজন পূৰ্বতকৈ অধিক জটিল হৈ পৰিব।
● অভিযোজন আৰু প্ৰশমনৰ দিশত পদক্ষেপ
গতিকে, সকলো দিশ চালি-জাৰি চাই ইতিমধ্যে একাংশ চাহ বাগিচাই এই পৰিৱৰ্তনৰ লগত নিজকে খাপ খুৱাবলৈ ব্যৱস্থা গ্ৰহণ কৰিবলৈ আৰম্ভ কৰিছে। কেইবাখনো বাগিচাই জলবায়ু স্থিতিস্থাপক চাহৰ জাতত বিনিয়োগ কৰিছে যিয়ে গৰম আৰু খৰাং উভয় পৰিৱেশ সহ্য কৰিব পাৰে।
বহনক্ষম আৰু জৈৱিক কৃষিৰ দিশতো জাগৰণ বৃদ্ধি পাইছে। ৰাসায়নিক সাৰ আৰু কীটনাশকৰ ওপৰত নিৰ্ভৰশীলতা হ্ৰাস কৰি কিছুমান উৎপাদকে অধিক স্থিতিস্থাপক আৰু পৰিৱেশ অনুকূলভাৱে চাহ উদ্যোগটোক গঢ়ি তোলাৰ পোষকতা কৰিছে। কিন্তু এই পৰিৱৰ্তন ব্যয়বহুল আৰু সময়সাপেক্ষ, ইয়াৰ যথেষ্ট বাবে অৰ্থৰ প্ৰয়োজন।
বৃহৎ পৰিসৰত চৰকাৰী হস্তক্ষেপ অতি গুৰুত্বপূৰ্ণ। চাহ খেতিয়কসকলক সহায় কৰিবলৈ ভাৰতীয় চাহ ব’ৰ্ডৰ সৈতে অসম চৰকাৰে জলবায়ু স্থিতিস্থাপক কাৰ্যসূচীৰ ক্ষেত্ৰত পৰ্যালোচনা চলাই আছে। বতৰৰ আগতীয়া সতৰ্কবাণী ব্যৱস্থা প্ৰৱৰ্তনৰ লগতে জলবায়ু দুৰ্যোগৰ ফলত ক্ষতিগ্ৰস্ত চাহ বাগিচাসমূহৰ বাবে আৰ্থিক সাহায্য প্ৰদানৰ প্ৰচেষ্টাও কৰা হৈছে।
● উপসংহাৰ – সামগ্ৰিক প্ৰচেষ্টাৰ অত্যন্ত প্ৰয়োজন
ক’ব পাৰি যে অসমৰ অন্যতম বৃহৎ সম্পদ অসমৰ চাহ উদ্যোগটো এক জটিল সন্ধিক্ষণত আছে৷ তথ্যই প্ৰমাণ কৰি দেখুৱাইছে যে জলবায়ু পৰিৱৰ্তন এতিয়া ভৱিষ্যতৰ ভাবুকি নহয় – ইতিমধ্যেই ই, অসমৰ চাহৰ গুণগত মানদণ্ড, উৎপাদন আৰু চাহ-উদ্যোগৰ ভৱিষ্যতৰ ওপৰত প্ৰভাৱ পেলাইছে। লাখ লাখ লোকৰ জীৱিকা দোদুল্যমান অৱস্থাত পৰিছে, এতিয়া যদি আমি চৰকাৰ-প্ৰশাসন তথা জনসাধাৰনে ইয়াৰ বাবে কাৰ্যপন্থা হাতত নলওঁ তেন্তে অসমে বিশ্বৰ অন্যতম আগশাৰীৰ চাহ উৎপাদক হিচাপে নিজৰ স্থান হেৰুৱাব লগা হব পাৰে !
আমি চাহ উদ্যোগত অধিক সজাগতা, ন-উদ্ভাৱন কৌশল, আৰু বহনক্ষমতাৰ বাবে চেষ্টা কৰিব লাগিব। জলবায়ু পৰিৱৰ্তনৰ বিৰুদ্ধে যুঁজিবলৈ স্থানীয় আৰু বিশ্বব্যাপী উভয় প্ৰচেষ্টা চলোৱাটো অতি প্ৰয়োজনীয়, যাতে অসমৰ চাহৰ সোৱাদ আগন্তুক প্ৰজন্মইও উপভোগ কৰিব পাৰে।
আহক আমি সকলোৱে সক্ৰিয় হৈ থাকোঁ, জলবায়ু পৰিৱৰ্তনৰ সন্মুখত অসমৰ চাহ উদ্যোগক সংৰক্ষণৰ দিশত কাম কৰোঁ।
