নিউজ ডেস্কঃ
কেন্দ্ৰীয় লোকসেৱা আয়োগে ২০২৫ বৰ্ষৰ নেছনেল ডিফেন্স একাডেমী (এন ডি এ) আৰু নেভেল একাডেমীৰ (এন এ) বাবে অনুষ্ঠিত কৰিবলগীয়া দ্বিতীয়টো পৰীক্ষাৰ সময়সূচী আনুষ্ঠানিকভাৱে ঘোষণা কৰিছে।২০২৫ চনৰ ১৪ ছেপ্টেম্বৰ দেওবাৰে ভাৰতৰ বিভিন্ন কেন্দ্ৰত লিখিত পৰীক্ষা অনুষ্ঠিত হ’ব।আয়োগে নিশ্চিত কৰে যে এন ডি এৰ সেনা, নৌসেনা আৰু বায়ুসেনা শাখাৰ লগতে ভাৰতীয় নৌসেনা একাডেমীৰ বাবে এই নিযুক্তি প্ৰক্ৰিয়াৰ জৰিয়তে ৪০৬টা খালী পদ পূৰণ কৰা হ’ব।
ইউ পি এছ চিৰ অধিসূচনা অনুসৰি একেদিনাই দুটা শ্বিফ্টত পৰীক্ষা অনুষ্ঠিত হ’ব। মুঠ ৩০০ নম্বৰ থকা গণিতৰ কাকতখন পুৱা ১০ বজাৰ পৰা দুপৰীয়া ১২:৩০ বজালৈ অনুষ্ঠিত হ’ব, তাৰ পিছত ৬০০ নম্বৰ থকা ‘জেনেৰেল এবিলিটি’ৰ কাকতখনৰ পৰীক্ষা দিনৰ ২:০০ বজাৰ পৰা বিয়লি ৪:৩০ বজালৈ অনুষ্ঠিত হ’ব। প্ৰশ্নকাকত সমূহ বস্তুনিষ্ঠ ধৰণৰ, দ্বিভাষিক (হিন্দী আৰু ইংৰাজী) হ’ব।
লিখিত পৰীক্ষাত যোগ্যতা অৰ্জন কৰা প্ৰাৰ্থীসকলে ‘চাৰ্ভিছ ছিলেক্সন ব’ৰ্ড’ (এছ এছ বি)ৰ সাক্ষাৎকাৰলৈ উত্তীৰ্ণ হব, সাক্ষাৎকাৰত ৯০০ নম্বৰ থাকিব। সাক্ষাৎকাৰত উত্তীৰ্ণ হোৱা প্ৰাৰ্থীসকলক তেওঁলোকৰ যোগ্যতা আৰু পছন্দৰ ওপৰত নিৰ্ভৰ কৰি ইণ্ডিয়ান মিলিটেৰী একাডেমী, ডেৰাডুন, ‘এয়াৰফৰ্চ একাডেমী, হায়দৰাবাদ, ইণ্ডিয়ান নেভেল একাডেমী, এজিমালা, অফিচাৰ্চ ট্ৰেইনিং একাডেমী, চেন্নাই, বা নেছনেল ডিফেন্স একাডেমীত দ্বিতীয় পৰ্যায়ৰ পাঠ্যক্ৰমত নামভৰ্তিৰ বাবে যোগ্য হিচাপে বিবেচনা কৰা হ’ব।
পৰীক্ষাৰ সাত দিন পূৰ্বে ইউ পি এছ চিৰ অফিচিয়েল পৰ্টেল – upsc.gov.in আৰু upsconline.nic.in ত এডমিট কাৰ্ড (ই-এডমিট কাৰ্ড) মুকলি কৰা হ’ব বুলি আয়োগে স্পষ্ট কৰি দিছে। হলৰ টিকট ডাউনলোড কৰিবলৈ প্ৰাৰ্থীসকলৰ এপ্লিকেছন আইডি আৰু জন্ম তাৰিখৰ প্ৰয়োজন হ’ব। সকলো প্ৰাৰ্থীকে আয়োগে তেওঁলোকৰ এডমিট কাৰ্ডৰ সবিশেষ সযতনে পৰীক্ষা কৰিবলৈ আৰু যিকোনো অমিল থাকিলে তৎকালীনভাৱে ৰিপৰ্ট কৰিবলৈ আহ্বান জনাইছে।
পৰীক্ষাৰ স্থানলৈ সকলো পৰীক্ষাৰ্থীয়ে নিজৰ ই-এডমিট কাৰ্ড লৈ আহিব লাগিব; অন্যথা তেওঁলোকক পৰীক্ষাত অৱতীৰ্ণ হ’বলৈ দিয়া নহ’ব। যদি কোনো প্ৰাৰ্থীয়ে এডমিট কাৰ্ড লাভ নকৰে তেন্তে তেওঁলোকক ইউ পি এছ চি হেল্পডেস্কৰ ০১১-২৪০৪১০০১ নম্বৰত যোগাযোগ কৰিবলৈ বা ব্যক্তিগতভাৱে আয়োগৰ কাৰ্যালয়ৰ সৈতে যোগাযোগ কৰিবলৈ পৰামৰ্শ দিয়া হৈছে।
