■ বিশ্ব ফুটবলত অন্য এক বিস্ময় লেমিন য়ামাল
■ ইউৰো কাপৰ আকৰ্ষণ ১৬ বছৰীয়া স্পেইনৰ য়ামাল
■ পেলে, মাৰাডোনা, মেচি, ৰোনাল্ড’ দৰে ফুটবল বিশ্বৰ যাদুকৰ সকলৰ পিছত অন্য এক নতুন বিস্ময় লেমিন য়ামাল
২০২৪ ৰ ইউৰো কাপত সমগ্ৰ বিশ্বতে চৰ্চাৰ বিষয় হৈ পৰিছে স্পেইনৰ ১৬ বছৰীয়া এই যুব ফুটবলাৰ গৰাকী। ইউৰো কাপৰ ফাইনেলত স্পেইন আৰু ইংলেণ্ড। স্পেইনে ফ্ৰান্সক হৰুৱাই ফাইনেলত পদাপৰ্ণ কৰিছে। এই ক্ষেত্ৰত সৰ্বাধিক অৰিহণা লেমিন য়ামালৰ। ফ্ৰান্সৰ বিপক্ষে য়ামালে দিয়া গলটো এক ইতিহাস হৈ থাকিব। ইউৰো কাপত সৰ্বকনিষ্ঠ খেলুৱৈ হিচাপে স্ক’ৰ কৰাৰ অভিলেখ স্থাপন কৰিলে ১৬ বছৰীয়া এই যুৱকজনে।
স্পেইনৰ ১৫, ১৬ আৰু ১৯ বছৰ দলৰ হৈ খেলাৰ উপৰিও য়ামালে জাতীয় দলৰ ১৩ খন মেচত ইতিমধ্যে অংশগ্ৰহণ কৰিছে। ২০২৩ চনৰ ২৯ এপ্ৰিলত বিশ্ব ফুটবলৰ মানচিত্ৰত ভৰি দিছিল য়ামালে।
স্পেইনৰ মাটাৰা প্ৰদেশৰ এটা শৰণাৰ্থী পৰিয়ালত জন্মগ্ৰহণ কৰা য়ামালক লৈ আজি বিশ্ব ফুটবল ব্যস্ত। পেৰিচৰ সা-জা ক্লাবে ভাৰতীয় টকাৰ মূল্যত ২ হাজাৰ কোটি টকা দি নিজৰ ক্লাবলৈ নিবলৈ চেষ্টা কৰিছে লামালক। ইউৰো ক্লাৱৰ ফাইনেলত ইংলেণ্ডৰ বিৰুদ্ধে য়ামালৰ ক্ৰীড়া কৌশল নিশ্চয় লক্ষ্য কৰিবলগীয়া হ’ব।
ইউৰো কাপৰ এইবাৰৰ আয়োজক জাৰ্মানী। জাৰ্মানীৰ শিশু শ্ৰম আইনৰ কৱলত পৰিছে বিশ্ব ফুটবলৰ নতুন যাদুকৰ য়ামাল। জাৰ্মানীৰ শিশু শ্ৰম আইন অনুসৰি স্থানীয় সময় নিশা ৮ বজাৰ পৰা নাবালক সকলে কাম কৰাটো অবৈধ। অৱশ্যে খেলুৱৈ সকলৰ বাবে নিশা ১১ বজা। অন্যথা প্ৰতিখন মেচৰ বাবে ২৭ লাখ জৰিমনা। ইউৰো কাপ আৰম্ভ হয় নিশা ৯ বজাৰ পৰা। ফলত সম্পূৰ্ণ সময় খেলিব নোৱাৰে লামালে। অৱশ্যে জৰিমণা দি হ’লেও ফাইনেলৰ সম্পূৰ্ণ সময় খেলিব স্পেইনৰ বিষ্ময়কৰ যুৱ খেলুৱৈ গৰাকীয়ে।
